قناة العاشق بين السلمية وأفاميا.قصة عشق أمير لإبنة ملك مملكة أفاميا

قناة العاشق بين السلمية وأفاميا.قصة عشق أمير لإبنة ملك مملكة أفاميا.

قناة العاشق بين السلمية وأفاميا

من حكايا سوريا والسوريين…
حكاية “قناة العاشق”..
القناية اللي بناها وعمرها عاشق من سلمية كرمال صبية من أفاميا أخدتلو عقلو وأنفاسو ..فكان عربون محبته آية فنية ومعجزة بالبناء ..

بتقول الحكاية : انو سلمية كان بيحكمها أمير شاب مقدام.. جسور..شجاع..

وبنفس الوقت طيب النفس وكريم ومحب للعلم والعمل وبيسعى دايما لتطوير أمارته وتحديثها وحمايتها..

وكان مشغول بأمور اﻷمارة ﻷنه كان يقوم باﻷعمال والشغل بنفسه..

وتحولت منطقة سلمية بعهده لمحطة قوية للقوافل التجارية ﻷهمية موقعها القريب من جهة عالبادية وحاضرة الزمان تدمر..

ومن جهة تانية عاباقي المدن الشمالية ..

فكانت سلمية محطة مهمة من محطات طريق الحرير البري الغربي..
وبنهاية القرن التاسع ق.م بعهد اﻵراميين ضموا سلمية ﻵرام حماة..

وكانت بالعصر السلوقي مرتبطة بأفاميا ( فيه طريق معبد مرصوف بالحجارة واصل بين المدينتين )

واتعرضت سلمية لزلزال هدمها (عاﻷغلب بسنة 333 ق.م)..وأعادوا بنائها أكتر من مرة…

وكانت البيوت مبنية بالحجر البازلتي اﻷسود وفيها معابد وقصور وطرق مرصوفة بالحجر وقنوات للري

(كان فيها 360 قناة ممتدة بين سلمية والقرى المجاورة..هيدي الطريقة المستخدمة لري اﻷراضي الزراعية)..

(بعدين بحكيلكن حكاية سلمية وفكرها ومبدعيها وتاريخها..)

حكاية الأمير وقناة العاشقين:

..هلأ خلونا نرجع لحكاية اﻷمير وقناة العشق..

بيوم من اﻷيام حطت قافلة رحالها بسلمية وكان فيها ملك مملكة أفاميا (كمان بحكيلكن حكاية أفاميا بعدين) ..

و معه بنته اﻷميرة الفارسة الجميلة والذكية (عاقولة ستي كاملة ومكملة ومافي بحسنها وجمالها مثيل..) ..

وكان ملك أفاميا من عاداته انو يتنكر (بملابس تاجر بسيط)

أثناء سفره وتنقلاته حتى ما يتعرض للمشاكل
وبعد استراحته بسلمية وهو عم يغادر ليتابع طريقه لمملكته ..

بيمر أمير سلمية وبيلمح بنت التاجر الحلوة (اﻷميرة الأفامية)

وبينسحر بجمالها ومابيقدر يشيل نظره عنها لدرجة انو كان رح يوقع عن حصانه…لحتى غابوا عن نظره وبعدوا…..

والتفت وقرر انو يلحق التاجر ليتعرف عا بنته..لكن للأسف ما لحقن المسكين واختفوا بين القوافل وضاعوا بهالمدى…
ووقع اﻷمير بغرام بنت التاجر وشغلت باله وخيالها ماعاد فارقه ليل نهار..

وصار يشوف خيالها بكل مكان ..مرة يشوفها بالصيد ومرة يشوفها فارسة ومرة بنت عادية ومرة أميرة ..

وكل مرة شكل ..

حتى اتهيألو انو صابوا مس من الجنون ولوثة بعقله بسبب هالعشق..

(هو كان يشوفها عنجد..بس ما بيعرف انها هي نفسها ﻷنو اﻷميرة اﻷفامية متل أبوها الملك كانت تحب تتنكر وتنزل بين الناس)..

وعرفوا الناس انو أميرهم عشقان جنية بتظهر وبتختفي فجأة وماحدا بيعرف عنها شي..

واﻷمير المسكين رح يجن من هالبلوة وقرر انو يدور عليها وانو يروح عالمكان اللي شاف خيالها فيه اكتر من مرة..بضيعة قريبة بين سلمية وأفاميا..

وبالصدفة بيمرق من جنبه بالقرية موكب بنت ملك أفاميا وبيشوفها اﻷمير وبيكتشف انها هي الخيال وهي بنت التاجر وهي الفارسة وهي الصيادة وهي اﻷميرة..

.وبيتأكد انها حقيقة مو خيال…(ايه أخيرا ﻻقاها)…

وطبعا هي مو منتبهة للأمير وﻻ عرفانة شو عم بيصير…
وبيقرر يروح يخطبها من أبوها ملك أفاميا والواضح انو كان حب من طرف واحد (من قبل اﻷمير)

رفض الأميرة الزواج وطلبها التعجيزي:

وكانت اﻷميرة رافضة لطلبه فحطت شرط تعجيزي حتى تقبل الزواج منه

(يعني رفض مهذب ولطيف ﻷنها واثقة انو مارح يقدر ينفذه..

(اي بس هي مابتعرف أهل سلمية وقدراتن اﻹبداعية )..

مهر العروس شق قناة من عين الزرقاء إلى أفاميا:

فاشترطت عاﻷمير انو يمد قناة لجر الماء من عين الزرقا الغنية بالماء بمنطقته السلمية لمدينتها أفاميا
وبما انو الحب أعمى ..وافق اﻷمير عالشرط..

أهل السلمية ضربتهم النخوة والحميمية وهبوا لمساعدته:

ورجع عاسلمية ووظف كل امكانياته وبلش يشق القناة والناس من محبتن وزعلهن عا أميرهن وشهامتن قرروا يشتغلوا معه ويساعدوه بشق القناة

(كل عمرن هيك أهل سلمية النشامى أهل الفكر واﻹبداع والشهامة واﻹخلاص )..

طول القناة 150 كم:

وهيك اشتغلت سلمية كلها بشق القناة بايدين أهلها ..وعملوا قناة بطول 150 كم

و(المكتشف منها بس 60 م قبل الحرب ).

شكلها متعرج وهندسي لتوصل المياه بشكل جيد من سلمية اللي بترتفع 475 م عن سطح البحر ..

ﻷفاميا اللي بترتفع 308 م عن سطح البحر…

وأنشأوا القناة بسرعة خيالية وباتقان ودراسة علمية وهندسية

وكلها مبنية من الحجر البازلتي المنحوت بشكل فني دقيق ومتقن..

وبارتفاعات متباينة ومختلفة وبعرض متفاوت بيوصل للمترين احيانا…

القناة المعجزة رعبون الحب الأعمى:

وفعلاََ صارت القناة المعجزة هي عربون الحب الجنوني

وعشق اﻷمير وغرامه وتضحيته كرمال البنت اﻷفامية اللي انصدمت بتنفيذاﻷمير لشرطها ..

سميت قناة العاشقين بعد موافقتها على الزواج:

وحن قلبها عليه ووافقت عالزواج منه (والله ما أحلاها بعد كل هالعذاب ترفض) .. وصارت هالقناة

اسمها..” قناة العاشق”..

مازال الها بقايا وآثار بمدينة سلمية (هلأ هي معروفة بالقناة الرومانية وعمرها 2000 سنة ..

وهي بالحقيقة وعاﻷغلب موجودة ومبنية بالقرن التاسع ق.م عا أيام اﻵراميين ..ﻻ كان في وقتها رومان وﻻ سلوقيين)..

بس المهم بعدا الشهامة والمرؤة واﻹقدام والفكر والفن والتقانة واﻹبداع وألعبقرية والحب والمحبة موجودة لحد هلأ عند أهل منطقة سلمية …

تحية مليانة حب لسلمية اللي أهلها هلأ عم ينضفوا قناة العاشق من حقد وكره وجهل اﻹرهابيين..

ليرجعوها تحفة فنية عربون الحب والسلام واﻷمان للأرض والوطن سوريا….

حييتم وفيكم ومنكم بتحيا سوريا…وتحيا سوريا…
*صور ﻷفاميا.. و صور لسلمية.

* بقلم: منال ظفور

******

ألبوم الصور:

******

المصادر والمراجع:

مواقع التواصل الإجتماعي – صفحة منال ظفور