سردات_حلبية

المطبخ الحلبيالعالمي

أصل الطبخ حلبي

توثيق التراث اللامادي والموروث

الشعبي_الحلبي

الكاتبغزوانبوسطةجي.

بزمناااتووو…

كان المطبخ الحلبي من قبل الميلاااد بحين ومين وحناحين..
مشهور بين كل الممالك..
بالتنوع والجودة والإتقان وحتى وصل لحد التفنن والفن والإبداع..
وكانوا الحلبية شيوخ الكار بفن الطبخ وتوابعوا..
تاريخياً تم توثيق المطبخ الحلبي واكلاته بالعهد العباسي..
وقصة الخليفة المأمون وطبق الحلو اللي تسمى ع إسمو من كتر ماحبو..
(المأمونية)
والطبّاخ الحلبي ضل بقصور الخلفاء والأمراء لقرون أساسي..
ووثق المؤرخ إبن العديم..
بكتابه (الوصلة إلى الحبيب)
(ج/27)
في وصف الطيبات)
وصف المطبخ الحلبي..
وتوابله وبهاراته الفريدة..
اللي تحمل توقيع كل ست بيت حلبية..
وعيلة الطباخ من قديم الزمان..
هنن طباخين السلاطين والخلفاء والأمراء..
والعلامّة الأسدي:في موسوعته المقارنة وصف وشرح بالتفاصيل عن ابداع المأكولات والمطبخ الحلبي..
اللي هو بحق السيد الأول بلا منازع والمتربع ع عرش المطابخ العالمية..
ومو غريب عن المطبخ الحلبي..
انو ياخد الجائزة العالمية ب فرنسا..
باريس/2007/م
ومو غريب ايام الفرنساوي..
الفرنسسين ومن قبلن الأتراك نقلوا فنون المطبخ الحلبي ع بلادن..
وصاروا يتباهوا فيه بين الأمم..
بس اللي بيحزن القلب..
انن ينسوا انو المطبخ الحلبي هو الأصل..
والمطبخ الحلبي مطبخ الشرق الأول..
ومو غريبة لما المعري قال..
لو دقت اكل الجنة لقلت الطهاة من حلب..
ومو غريب انو ست البيت الحلبية..
بتعادل اكدعها شيف عالمي..
ووصلت وصييلا..
انو تطبخ اطيب الطبخات واجودها..
ومن كل الأطباق المتنوعة وانواع الحلويات والشرابات..
وهيي صايمة..
بدون ماتدوق الطبخة..
وبيطلع من تحت دياتها كلشي راكز وزابط ع البكلة..
وحتى في نسوان بقولوا عنن الحلبية..
(نفسا طيب بالأكل)
وهون ماعم نحكي عن مقادير ووصفات من النت..
هي شغلة النفس بالطبخ..
روحانيات ماحدا بيعرفا اللي عندو..
أم أو مرة أو اخت أو حماية..
نفسا طيب بالطبخ والأكل..
الحلبية: وازنوا بين الحلو والحامض والتوابل..
بطبق اللحمة بكرز..
وهادا طبق حلبي بحت..
وانا كتير تفاجأت انو بريحا منشأ الكرز الوشنة..
مابيطبخوا لحمة بكرز..!
بس بمطاعم جبل الأربعين بيساووها بس لأهالي حلب..
ومعروف مين هنن مطاعم جبل الأربين..
ومعروفة انو جبل الاربين بالقرن الماضي العشرين..
كانت مصايف الحلبية بجبل الأربين..
تؤأمة غريبة عجيبة بين الحلو والحامض..
بكرز الوشنة حصرا..
يعني حصرا الوشنة..
نعني بس الوشنة..
مو حيالله كرز..!
كلشي ع أصوله..
والكرز أصله من فصيلة المحلب وبعدا بيطعموه(طعم)
وموطنه الأساسي بالشمال من بر الشام..
متلو متل الصنوبر الحلبي..
والفستق الحلبي..
والغار الحلبي..
والزيت والزيتون الحلبي
اللي بينعصر ع البيرد (ع الحجر)
والسبع بهارات الحلبية هي اختراع وشهادة منشأ بس لحلب..
مشان مو كل شوي يفتحوا مطربانات ويرشوا بهارات..
الحلبية:اخترعوا مزيج وخلطة سحرية خاصة فيهن..
موزونة وهيي خلاصة الطعم والذوق..
وصارت أساسية بكل المطابخ بالعالم..
وحتى طبق اللحمة بكرز..
الها بهاراتا..
كرز حامض..
سكر..
لحم ضاني مشوي حصرا..
بقدونس..
قرفة..
وطبعا السبع بهارات بتبلة اللحمة..
طبق عند الحلبية سنفونية تذوق..
والحلبية كانوا يمونوا الكرز الوشنة مونة متل كل المونة الصيفية اللي بخزنوها للشتوية..
وماكان بيت حلبي يخلا من مونة الكرز..
نعني متلا متل اي طبخة حلبية..
دقت كتير لحمة بكرز بالمطاعم..
بس….!!
اللي نجحوا بهالأكلة وكانوا شيوخ الكار فيها..
مطعم أرتين بجبل الأربين..
ومطعم القمة (الزمار)باب الفرج والسبيل..
هدول شيوخ الكار ونفسهن طيب وكرما..
وولاد الزمار ورتانين الطبخ كابرا عن كابر..
من عزمان مطعم(سطح)بالنافعية)
ومو غريب انو كتير مطاعم فتحت وسكرت بحلب..
لانو المطعم اللي بدو يفتح بحلب ويضل مكمل شغل وينجح..
متل اللي عم يبيع مي بحارة السقايين..
لأنو الحلبية بيكشفوا الغش من اول لقمة..
وفيهن كفائة يفطروا بحلب ويتغدوا بحماة ويتعشوا بالمعرة..
اذا كانت اللقمة طيبة وصاحب المطعم بشوش وكريم..
يابيرفعوه لسابع لسما..
يابجيبوه لسابع ارض..
سآل حياللة حلبي..
عن اللقمة الطيبة والنفس الطيب بالأكل..
بقلك الهيطلاني بباب النصر..
وابو العجة اللي جنبو..
والسودة المشوية ع حيط الاوقاف بالأصيلة..
والعمبر بوظ عند الأفندي بباب الفرج..
والحلو تبع المستت والمهروسة..
والمشاوي تبع العتيق..
والفروج المشوي ع الفحم من عند النيل..
والطبخ تبع الخويتمي..
والعش البلبل تبع ستوت والنقار..
والحلاوة تبع العكش..
والمامونية عند الطرابيشي..
والشاورما عند الحطاب..
والفلافل قصة تانية..
ماعمنحكي عن فلافل مشوار والنزهة وسلاف وفلافل حلب بالمدينة..
في كان بياع فلافل ع حيط جامع بحسيتا بتذكر اسمو يمكن ابوصلاح..
لف لفتك ع كيفك..
واللي داق منها بيعرف..
ومو غريبة..
انو في كان ناس تنزل ع سوق الجمعة مع شلة رفقة متراهنين بلعبة طرنيب او تركس..
ع اكلة عجة او قلوبات بسوق الجمعة..
ومو غريبة انو الحلبي يكون ذواق من الطراز الرفيع..
ويجيب الشعيبيات من اريحا ومن إدلب..
والزيت من عفرين..
وحلاوة الجبن من حماة ولا من حمص هههههههههههه…
والبرازق والصفيحة وقمر الدين من الشام..
والبامة من الدير..
واللبن من الباب..
والرمان من الباسوطة..
والجبنة والراحة من درعا..
والهريسة من النبك..
والسمن العربي من الجزيرة..
والجبس من حمص..
والقيمق والجبنة م الرقة..
وغيروا وغيراتوا كتير..
لأنن هدول ناس ذواقين ومابيعجبن العجب..
ومعروف عنن الحلبية انن كتير متقنين ومنفنفين ومابيعجبن إلا كلشي ع أصوله..
وعفكرة الأكلات والطبخ تراث وفن بحد ذاتو..
يعني السياح اللي بروحوا ع ايطاليا لياكلوا السباكيتي اكتر من السياح اللي بزوروا برج بيزا..
واللي بزوروا اليابان لازم يجربوا طبق السوشي..
واللي بروحوا ع متحف الشوكولا بسويسرا..
وبأمريكا وجبات الهوت دوك والمكادونالز..
واكيد رح يجربوا القهوة التركية باسطنبول..
والقهوة العربية والمندي باليمن..
والكسكس بالمغرب..
والكوارع بمصر..
وكل البلاد اللي إلها تراثها المشهورة فيه..
بس نحنا الحلبية ابوس روحنا غير شكل..
جربولكن شي مرة من المرات..
تعملوا مسابقة عالمية وجيبوا أشهر الشيفات بالعالم..
ومن حلب لا تاخدوا ولا شيف..
دقوا بابصاء ع حياللة بيت حلبي..
وقولوا لست البيت مطلوبة ع مسابقة طبخ..
وشوفوا وقتا..
اش بيطلع من تحت دياتا..
الشي اللي بيتدرس بالمعاهد تبع الطبخ سنين..
وخود من هالطيبات..
من محاشي وكبب ويبارق وحلويات ومعجنات وشرابات ومربايات..
وشي من مجاميعوا ومن أحسنو..
وبلا وصفات ولا مقادير..
بس بالروح والنفس..
وعفكرة: اللي بتحط طنجرة اليبرق وبتنوس عليها طول الليل ساعات وساعات..
هي مو من الويش..
هي إسما خبرة..
واللي بتطبق طنجرة اليبرق احسن من المهندس المدني..
واللي بترسم صينية الكبة بصينية ولا لوحات بيكاسو..
هي ورتانة هالشي وريتة أماً عن نانة..
مو عن دراسة وشهادات..
وعفكرة: حقهن العالم يغاروا من الحلبية..
لحد مايصير معهن إحتباس حراري بالدماغ..
وحقهن ينكادوا وينغاظوا منن لابعد حد..
لأنو الحلبية ماتركوا باب من بواب الإبداع مادخلوه وكانوا بصدر الديوان..
من العلم..
للأدب..
للتجارة..
للصناعة..
للموسيقا..
للفن..
للطرب..
للطبخ..
للعمارة..
للزراعة..

مشالله عليهن متل طاسة الجان..
ومتل الزبدية الصيني منين مانقرتن برنوا..

وبالإيخر رحم الله عبدا عرف قدره فوقف عنده..

يعني الفستق حلبي..
نعني من حلب المنشأ مو من مورك..
والورد الجوري ل حلب يا أسوم..
مو الوردة الدمشقية..
والقدود حلبية مو حمصية..
وامين الجندي اللي كتب بالقدود لحنوهن الحلبية واللي غنوهن الحلبية واللي شهروا الجندي هنن الحلبية..
ونكروا عليه كلمات اللي كتبها..

والمحاشي مو هيي (الدولما التركية)
والكبب اللي وصلت قريب المية شكل بحلب..
ووثقها العلامة الأسدي..
لو عملوها الشوام والبيارتة بتضل بشهادة منشأ حلبي ياخيو..
والأصلي غير ياخيووو..
والسبع بهارات لحلب مو للهند..
والزعتر خلطة توابل حكر ع أهل حلب..
ومو كل طرق بالطاس صار سواس..

والبقلاوة واللحمة بكرز واللحم العجين..
كمان لحلب مو للتراك..
والسنوبر حلبي ياخيو..
وحتى تعريفوا بكل جامعات العالم الصنوبر الحلبي..
ولأزيدكن من الشعر بيت..
لك حتى التراب بحلب مطرحو فوق الراس..
والماو مسدق..
يسأل نانته او سته أو حبابته..
عن البيلون والدريرة الحلبية..

الحلبية:ناس متوسطين بين الناس..
بحبوا كل الناس هينين لينين كرما..
جدهن حاتم طي..
واللي بتاخدوه مننا نحنا الحلبية عن محبة وطيب نفس..
أضعاف مابتاخدوه بالكدب والملوفكة والتدليس..
حلب كتييييير كبيرة اكتر بكتير من خيالكن الخصب..
واهلا وسهلا فيكن بحلب..
وإذا ماوسعتكن الأرض بتوسعكن قلوبنا..
بتنوروا حلب والصدر إلكن والعتبة إلنا..
ونحنا الحلبية عطول كلمتنا المشهورة..
والله والبيت بيتكن.
والفهيم يفهم.

والعبرة بالخواتيم..