ابن أحمد السويدي مات بسبب لعبة.. ومحمود طاهر شال نعش ابنه.. ودينا غبور بنتها المرض بياكل فـ جسمها.. و4 رجال أعمال مشاهير ولادهم اتسببوا في تعاستهم

حكاية مليونيرات ربنا ابتلاهم في عيالهم..

👇
أحمد السويدي خلف 4 ولاد من مراته الأولى هبة السويدي.. عبدالرحمن وخديجة وإسماعيل ويحيى.
وبعد الطلاق عاشوا مع مامتهم..

و”إسماعيل” كان بيدرس في مدرسة داخلي في إنجلترا وقدم على جامعة هناك.. وكان مستنى يتقبل بفارغ الصبر.
ولما الجامعة بعتت الرد بالموافقة.. أول واحدة عرفت الخبر كانت مامته.. وطلعت عشان تبلغه في أوضته وتفرحه.. لكن لقت الباب مقفول ومقدرتش تفتحه فـ نادت ع السواق وفضل يزق في الباب.
ولما اتفتح لقوا حاجة بتقع على الأرض.
ودخلت “هبة” وشافت “إسماعيل” ابنها خانق نفسه بحزام.. بسبب لعبة تحدي على التيك توك بتقيس القدرة على التحمل..
و”إسماعيل” كان مشترك في اللعبة من غير ما حد يعرف لحد ما راح بسببها.

وبعد وفاته هبة السويدي فضلت شهور مستنية الموت هي كمان.
أما باباه أحمد السويدي فـ الدنيا اسودت ف وشه مدة طويلة.. خصوصا إن “إسماعيل” كان أعز ولاده على قلبه..
وبعدها قعد شهور ميروحش الشركة. لحد ما قدر يبتدي من تاني ويكمل عشان خاطر ولاده الباقيين.

👇
واللي شال نعش ابنه المهندس محمود طاهر، رجل الأعمال الكبير ورئيس النادي الأهلي السابق.

ومحمود طاهر عنده ولدين.. حسن وعمرو.
وحسن مهندس زي أبوه.. وعنده 34 سنة.. وصحته كانت زي الفل.
لكن في ليلة طب ساكت وهو في بيتهم.. ولما نقلوه مستشفى جنب البيت كان وصل ميت.. والسبب أزمة قلبية مفاجئة.

👇
ورجل الأعمال إبراهيم العرجاني جرب فقدان الضنى لما ابنه “وسيم” مات في حادثة عربية سنة 2020.

والطفل وسيم كان مسافر من القاهرة للإسماعيلية ومعاه 3 من قبيلتهم لما العربية اتقلبت بيهم على الطريق الصحراوي.
واتنين من الأربعة ماتو في لحظتها.. و”وسيم” اتنقل على المستشفى في حالة خطر.. والرابع ربنا نجاه ومحلصوش حاجة.
وفضل وسيم العرجاني في غيبوبة كام أسبوع لحد ما مات.

👇
أما سيدة الأعمال دينا غبور فـ ربنا ابتلاها في بنتها.

والحكاية ابتدت يوم 6 يناير السنة اللي فاتت.. وكانت ليلة عيد الميلاد والعيلة كلها سهرانة برا بتحتفل.

والساعة 11 بالليل تليفون “دينا” رن وسمعت الخبر الصادم:
“بنتك عندها السكر في حالة متأخرة جدا”.

وانهارت “دينا” في اللحظة دي والبنت الصغيرة كمان كانت في حالة صعبة.
بس بعد شوية قررت “دينا” وبنتها يواجهوا المرض ويتماسكوا.
وبعدها دينا بدأت تساعد في مواجهة مرض السكر في مصر خصوصا للأطفال. واشتركت في حملات مع مستشفى الناس وبقت مهتمة أكتر بالعمل الخيري زي والدتها الست علا غبور مؤسسة 57357

والنهارده بنت دينا متعايشة مع السكر والحمد لله حالتها الصحية أفضل.

👇
ومن المليارديرات اللي عيالهم كسروا ضهرهم ودفعوا ملايين عشان ينقذوهم.. محمد الهواري صاحب “هايبر وان”..
وابنه “كريم” موت 4 شباب زي الورد بعربيته في الشيخ زايد وهو شارب مخدرات.

واضطر الهواري الكبير يدفع 4 مليون لكل أسرة.. يعني 16 مليون جنيه.. غير رحلات حج وعمرة لأهالي الضحايا. وكمان وظف أسرهم في الشركات بتاعته..
وبعدها خد منهم تنازل.. وابنه اتحكم عليه بـ3 سنين.. وشوية وخد عفو وطلع.

ونفس الحكاية كامل أبوعلي… ابنه “هيثم” موت مهندسة اسمها مي إسكندر في الغردقة بعربيته.

وبسببه ملك السياحة والفنادق شاف أيام سودة لحد المشكلة ما عدت بأقل الخساير.

وزمان ابن رجل الأعمال محمد أبوالعنين موت ولد في البحر بالغلط.. والقضية قلبت مصر أيامها.
لكن بالفلوس الموضوع عدى.

فعلا.. صدق اللي قال “مش كل الرزق فلوس”.
*****************
المصادر:
– مواقع: الجزيرة .نت
– موقع: مصراوي
– موقع: البيان
– موقع  BBC
– الرياض – العربية Business
– صفحة الآتحاد العربي للثقافة
موقع : بيت الشعر بالمغرب
– موقع: https://www.bbc.com
– موقع : سبق
– موقع الشرق الأوسط
— موقع:اليوم السابع
– مواقع: العربية .نت
– موقع : مدارات الثقافية
– موقع: صحيفة النهار
– إتحاد المصورين العرب فرع مصر
المصدر: مواقع إلكترونية
– موقع: عكاظ
– موقع : المصرى اليوم
– مواقع :تواصل إجتماعي – فيس بوك – ويكبيديا
– موقع: مجلة فن التصوير
-موقع:  إيليت فوتو آرت: https://elitephotoart.net
**********