أسهل محصول شتوي في العالم كله.. بدون ري ولا تسميد، ولا عزيق ولا رش للحشائش!
من ساعة ما تحط البذرة لحد الحصاد مفيش أي عمليات زراعية.. محصول مش مكلف على الإطلاق.
أنا بتكلم عن محصول الحمص.
الحمص بيتزرع في الأراضي القديمة التقيلة، اللي أي محصول تاني ما بينفعش فيها. زراعته زي الزراعة البعلية بالظبط، وبيتزرع حراتي أو تخضير.
تعالى معايا خطوة بخطوة أقولك تعمل ايه:
احنا فين دلوقتي؟
احنا حالياً في التلت الأخير من شهر أكتوبر، لازم تجهز حالك للزراعة لأن الزراعة هتكون في أول نوفمبر بإذن الله.
الخطوة الأولى: تجهيز الأرض
هتحرت أرضك حرتتين متعامدتين، تحرت الأرض كويس وتطلع فيها القنايات، عشان تجهز حالك للرية الكدابة.
وهتضيف للفدان من 4 لـ 6 شكاير سوبر فوسفات، وشكارة أو اتنين سلفات نشادر اللي هي 20.5%
ويا سلام لو كمان 50 كيلو سلفات بوتاسيوم.
وبعدها تروي الرية الكدابة.
لو عملت الخطوات دي على نهاية أكتوبر، هيكون قدامك من أسبوع لـ 10 أيام على حسب نوع التربة والرية اللي رويتها، عشان الأرض تكون جاهزة ومستحرثة للزراعة الحراتي.
الخطوة التانية: الزراعة الحراتي
الزراعة الحراتي بتكون يا إما بالجرار الصغير الكبوتة الصغير، أو بمحراث الأبقار.
احنا بنقول زراعة بعلية فهي زراعة تقريباً بدائية، بس ميزتها إن إنتاجها عالي ومش مكلفة.
هيحرت بالأبقار ويبدر البذور ويغطي عليها بحتة خشبة أو دحداحة ورا منها.
الفدان بياخد من 50 لـ 60 كيلو من بذور الحمص.
والمسافة بين الخطوط بتكون حوالي 30 لـ 35 سنتي.
والمسافة بين النباتات بتكون حوالي 15 لـ 20 سنتي بين كل بذرة والتانية.
دي كمية التقاوي والمسافة بين النباتات في الفدان.
بعد كده تعمل ايه؟
بعد ما تعمل كل العمليات دي وتغطي على البذور، انت قدامكش أي حاجة تاني تعملها كعمليات زراعية غير على نصف شهر مارس بإذن الله.
لكن كعلاج وإصابات وعلاج أمراض، بيتعالج وبيترش وبيتكافح وبيترش مغذيات زي أي محصول تاني.
محصول الحمص محصول بقولي شتوي بيزرع في الأراضي القديمة والأراضي التقيلة سيئة الصرف، علشان هو أصلاً مش هيتروي إلا الرية الكدابة بس لحد الحصاد.
عايز تتابع معانا زراعة الحمص من البداية حتى الحصاد؟
عندك أرض سودة تقيلة سيئة الصرف ومش هتتروي تاني لحد الحصاد وعندك إمكانية تطبق الخطوات دي معانا؟
اكتب “حمص” في التعليقات، واكتبلي الخطوات اللي انت هتعملها ونوع التربة عندك ايه وانت منين.
احنا ده موقع تواصل اجتماعي يا إخوانا، عايزين نتواصل مع بعض ونحاول نفيد بعض.
صورلي الغيط بتاعك ونزله في التعليقات، قولي أنا رويت النهاردة أزرع امتى، قولي أجيب التقاوي منين، خد ودي معايا واكتب في التعليقات.
لو نويت فعلاً ابعت لي صور غيطك فعلاً وندلك على الصح فعلاً، عشان أنا عاوز مصلحتك وان انت تجيب محصول كويس بتكلفة أقل.
أنا عبدالله أبو الليل وبحاول أقدملك معلومات زراعية علمية مفيدة ترتقي بالمزارع.
#عبدالله ابوالليل#مجلة ايليت فوتو ارت
