مجرد السلام على جورجينا رزق كان حلم بعيد المنال بالنسبة للفنّان اللبناني وليد توفيق، بس القدر دايمًا إلو كلمة تانية.. تولدت بيناتن قصة حب لافتة، كبرت شوي شوي، ووصِلت لزواج عرفي وبعدين زواج رسمي.

بس السؤال اللي ضلّ مطروح: يا ترى جورجينا غيّرت دينها كرمالو؟

سنة 1974، ركب وليد توفيق الطيارة لأول مرة بحياتو بعد ما دعاه المخرج حسن الإمام يزور مصر. وقتها شهرته ما كانت متخطّية حدود لبنان، بعد نجاحه بستوديو الفن، وكان بعدها عم يشتغل مقاول كهربا..

الغريب إنّو أوّل ما فات على الطيارة شاف سجادة حمرا مفروشة وورود من كل الجهات، فكر إنّو كل هالحفاوة معمولة إلو، وهو مش مصدّق حالو. فجأة شاف طاقم الطيارة والمضيفات عم يركضوا وعم يقولوا: الملكة وصلت. وساعتها اكتشف إنّو ملكة جمال الكون جورجينا رزق راكبة الطيارة..

المفاجأة إنّو بهداك اليوم رفض يقوم يسلّم عليها. المنتج حسين الصباح قالو جرّب قرّب منها، هيدي لسا عاملة فيلم مكسر الدنيا مع عمر خورشيد، فيلم “غيتار الحب”..

وليد ردّ عليه وقالو: يا زلمي بتطلع فيي؟ أنا بعدني غلبان..

ولما نزلوا على مطار القاهرة، شاف نفس الحفاوة الكبيرة لجورجينا، وشاف عدد هائل من الصحافيين كلّن مهتمّين فيها، ولا واحد فكّر حتى يسلّم عليه..

أول زواج بحياة جورجينا كان من المناضل علي حسن سلامة، يلي كانوا يلقّبوه بالأمير الأحمر بسبب غناه الفاحش. بعد شهر عسل قضوه بهاواي، رجعت جورجينا على بيروت لما تأكّدوا من حملها الأول، يلي ما لحق يشوف بيّو بعد ما اغتيل بعملية مدبّرة..

بعدها جورجينا بعدت تمامًا عن الأضواء، وبنفس الوقت وليد قدر يثبت حالو عالساحة الفنية، وهيدا الشي خلّى منتج يعرض عليه يعمل فيلم بمشاركة جورجينا..

وبالفعل، زارها وليد مع المنتج بباريس ليعرضوا عليها المشروع..

وليد كان متخيّل إنّو جورجينا عايشة بقصر، بس انصدم إنّها كانت عايشة بشقة متواضعة مع ابنها علي. رفضت تعمل الفيلم وقالتلو إنّها ما بدها ترجع للأضواء نهائيًا، وقالتلو إنّها متفرّغة كليًا لتربية ابنها..

هالكلام أثّر بوليد وخلّاه يشوفها بنظرة تانية، بعيدة عن الشهرة والنجومية..

مرق وقت طويل، والتقى وليد بجورجينا مرة تانية سنة 1984 بالشام، وساعتها تطوّرت علاقتهم لحب..

صاروا يتلاقوا لمدة شهرين، لحدّ ما وليد تعلّق فيها كتير وصار يخاف عليها. قرّر يبعد عنها ويرجع علبنان، بس ما قدر يبعد شهر واحد، وغنّى إلها واحدة من أجمل أغانيه الرومانسية “إنتِ الشمس”..

رجع وليد على دمشق، وبعدها راحوا سوا على باريس، وقربوا أكتر من بعض، وبعدين تزوّجوا زواج عرفي. وليد بيقول إنّو زواجهم كان سهل وسريع، وضلّوا متزوّجين عرفي سبع سنين، بيوصفهم إنّهم كانوا متل شهر العسل..

واجهوا تحدّيات كتير بهالفترة، بس جورجينا كانت قوية جدًا وتمتص أي مشكلة. أما وليد فاعتبر علي ابنو، لحدّ ما قرّروا يتزوّجوا رسمي وبشكل علني قدّام الكل..

من دون فرح، ولا خاتم ألماس، ولا حتى فستان زفاف، تم الإعلان عن الزواج..

الغريب إنّو خلال فترة الزواج العرفي، انعرض على جورجينا الزواج من شخصيات مهمة، معظمهم عندهم طيارات خاصة، لكنها رفضتن كلّن كرمال وليد..

بس ضلّ موضوع ديانة جورجينا محيّر.. مرّة وليد قال إنّها غيّرت دينها للإسلام بعد زواجها الأوّل، ومرّة تانية قال إنّها ضلّت على دينها، وهو تقبّل هالشي لأنّو، متل ما وصف حالو، شخص open mind.

على كل.. عاش وليد وجورجينا حياة مستقرة، ورفضت جورجينا ترجع للأضواء بأي شكل من الأشكال، واكتفت بدورها كأم لابنها علي، بالإضافة لأولاد وليد: توفيق جونيور ونورهان.

*****************
المصادر:
– مواقع: الجزيرة .نت
– موقع: مصراوي
– موقع: البيان
– موقع  BBC
– الرياض – العربية Business
– صفحة الآتحاد العربي للثقافة
موقع : بيت الشعر بالمغرب
– موقع: https://www.bbc.com
– موقع : سبق
– موقع الشرق الأوسط
— موقع:اليوم السابع
– مواقع: العربية .نت
– موقع : مدارات الثقافية
– موقع: صحيفة النهار
– إتحاد المصورين العرب فرع مصر
المصدر: مواقع إلكترونية
– موقع: عكاظ
– موقع : المصرى اليوم
– مواقع :تواصل إجتماعي – فيس بوك – ويكبيديا
– موقع: مجلة فن التصوير
-موقع:  إيليت فوتو آرت: https://elitephotoart.net
**********