البيت الدمشقي العتيق ليس مجرد مكان نعيش فيه، بل مساحة نشعر فيها بأنفسنا.
تفاصيله البسيطة تحمل عمقاً لا يُشبه شيئاً آخر؛ باحة مفتوحة للسماء، ياسمينة تعرف طريقها إلى القلب، ونافورة ما زال صوتها يهمس بحكايات قديمة. هنا كان الوقت أبطأ، والعيش أصدق.

في هذا البيت تشعر أن لكل حجر ذاكرة، ولكل ظل معنى، وأن الدفء لا يأتي من التدفئة بل من الأرواح التي مرّت من هنا. هو بيت يعلّمك أن الجمال لا يحتاج مبالغة، وأن الراحة قد تكون في البساطة.

والسؤال لكم:
لو خُيّرت بين بيت عصري حديث بكل وسائل الراحة، وبين بيت دمشقي عتيق مليء بالروح والذكريات… أيّهما تختار؟ ولماذا؟

أقسام البيوت الدمشقية القديمة: رحلة جوّا التراث
– عائشة قجة.
البيت الدمشقي ما بيشبه أي بيت تاني، فيه لمسة سحرية بتاخدك لزمن حلو كتير. تعالوا نعمل جولة سريعة ونكتشف أقسام البيوت الدمشقية يلي كل زاوية فيها بتحكي قصة.
أقسام البيوت الدمشقية القديمة

البيت الدمشقي مقسوم لثلاثة أجنحة:
• السلاملك: جناح الاستقبال الخارجي مخصص لاستقبال الضيوف وخاصة الرجال.
• الحرملك: الجناح المخصص للمعيشة والأسرة، خاص بالنساء.
• الخدملك: الجناح المخصص للخدم، وبيحتوي على الغرف الخاصة بالخدم والخدمات اللازمة.
الزقاق والخوخة
أول ما تدخل البيت الدمشقي، بتلاقي باب الصئاء (الزقاق)، وهو الباب الكبير يلي بيفتح لمرور الأغراض الكبيرة. أما الخوخة، فهي الباب الصغير المدمج جوّات الباب الكبير، وبيدخل منو شخص واحد.
الدهليز
من بعد ما تدخل من الباب، بتمشي بالدهليز، ممر ضيق ومعتم شوي بيوصلك لصحن الدار. بهاللحظة، بتسمع الزائر عم يقول “يا الله يا الله” منشان ينبه أهل البيت إنو دخل.
أرض الديار (صحن الدار)
•
هون بتلاقي الفسحة الكبيرة المفتوحة عالسما. بوسطها في بحرة مزخرفة، وحوليها بتلاقي أشجار الياسمين والنارنج والليمون. هالفسحة هي روح البيت الدمشقي.
البرّاني (الديوانية)
هي الغرفة القريبة من المدخل، وبيسموها كمان المضافة. عادةً بيكون هالمكان مخصص لحل المشاكل أو لاستقبال الضيوف القريبين.
الإيوان
هو مكان مرتفع شوي عن صحن الدار، مفتوح مباشرة على الفناء، وبيحوي قنطرة فخمة اسمها تاج الإيوان. هون عادةً بيقعد أهل البيت مع الضيوف، خاصة إذا جايين بسرعة لقضاء شغلة سريعة.
الجوّاني (القاعة)
•
هي الغرفة الكبيرة المزخرفة يلي بتكون داخلية، وبيستخدموها لاستقبال الضيوف المهمين. سقفها مزخرف وفيها بحرة صغيرة اسمها الفستئية.
المندلون
•
المندلون هو شباك صغير بيفتح على الجدار يلي بيفصل البيت عن بيت الجيران. من هالشباك، ست البيت بتحكي مع جارتها وبيتبادلو الأكل “السكبة”.
المشرفة
•
المشرفة هي السطح الصغير بين الدرج وغرف النوم بالطابق العلوي. هون بتحط ست البيت الغسيل لينشف، وغالباً بيطل على أرض الديار.
القبو
القبو هو الغرفة تحت الأرض يلي بتنزل عليها بدرج. هون بيحطوا المونة لأنها بتكون باردة وبتساعد على حفظ الأكل لفترة طويلة.
النصية والسقيفة
النصية هي الغرف العلوية يلي عادةً بيكون حجمها أصغر. أما السقيفة، فهي الغرفة فوق المطبخ، وبيحطوا فيها الحطب والأغراض يلي ما بيحتاجوها يومياً.
أسماء الأثاث بالبيوت الدمشقية
البيوت الدمشقية بتشتهر كمان بالأثاث والأدوات اللي إلها مسميات خاصة. بعضها قديم كتير، وما زالت بعض هالمفردات مستخدمة ليومنا هاد.
– برطوشة الباب: هي قطعة اسمنتية أو رخامية بتنحط على حافة أرضية الأبواب، بتحميها وبتحافظ على جمال المدخل.
– الساقط: هو مفتاح باب البيت.
– السقاطة: هي المطرقة اللي بتنضرب على باب البيت للتنبيه، وغالباً بتكون على شكل حلقة أو إيد الإنسان، مصنوعة من الحديد  كان يحتوي الباب على تنتين وحدة بمنتصف الباب للنساء و وحدة اعلى بشوي واكبر للرجال.
•
– القنصلية (كونسول): من المفردات الشامية القديمة، وهي عبارة عن مراية جدارية مع طاولة بيضاوية الشكل، غالباً بتكون موجودة بمدخل البيت.
•
– الصوبيا: مدفأة الشتاء اللي بتدفّي البيت الدمشقي، وبتشتعل يا بالحطب يا بالمازوت.
•
– النملية: خزانة خشبية للأكل، إلها نوافذ مصنوعة من المنخل المعدني، بتسمح بتهوية الأكل ومنع النمل والذباب.
– الكانونة: مدفأة جدارية موجودة بالمطبخ العربي الكبير، وبيستخدموها للطبخ عن طريق حرق الحطب أو الفحم.– الطاقة: فتحة صغيرة وعالية بتكون بالمطبخ أو بالحمام للتهوية، بتساعد على تجديد الهواء ومنع الرطوبة.
المزيد عن بيوت دمشق:
•
تاريخ تأسيس البيوت الدمشقية
البيوت الدمشقية بدأت بالبناء بطرازها الحالي من سنة 1036م، وأول بيت دمشقي قديم كان بيت الخليفة الأموي معاوية بن أبي سفيان، واللي كان اسمو دار الإمارة أو قصر الخضراء نسبة للقبة الخضراء اللي كانت تعلوه.
مميزات البيت الدمشقي
البيت الدمشقي بيتميز إنو متوافق مع طبيعة الشام، يعني بيوفر الراحة والبرود بالصيف والدفا بالشتوية. تصميمه بيسمح بدخول الشمس من الواجهات المختلفة حسب دوران الشمس، والبحرة اللي بوسط البيت بتعمل متل مكيف طبيعي بتلطف الجو.
أشهر البيوت الدمشقية
من أشهر البيوت الدمشقية بيت خالد العظم بحي ساروجة، وهو تحفة فنية من الزخارف الدمشقية. وكمان في بيت أسعد باشا العظم يلي تحول لمتحف للتقاليد الشعبية، بالإضافة لبيوت متل بيت سليمان ومكتب عنبر، وغيرهم كتير من البيوت الفخمة يلي بتحكي قصة التراث الدمشقي.
البيوت الدمشقية والسياحة
من التسعينات، تحولت كتير من البيوت الدمشقية لمطاعم ومقاهي سياحية، متل قصر الأمويين، قصر النرجس، وبيت جبري. هالأماكن صارت وجهة أساسية للسياح يلي بيحبوا يتعرفوا على التراث السوري ويستمتعوا بجمال البيوت الدمشقية.
البيوت الدمشقية بالأدب والشعر
الشاعر نزار قباني وصف البيوت الدمشقية بأجمل الكلمات، وقال: “هل تعرفون معنى أن يسكن الإنسان في قارورة عطر؟ بيتنا كان تلك القارورة”. فيديو منزل نزار قباني:
البيت الدمشقي هو أكتر من مجرد بيت، هو لوحة فنية معمارية بتجمع بين التاريخ والتراث والروح الدمشقية الأصيلة. كل زاوية فيه بتحكي قصة، وكل قسم بيحمل ذكريات أجيال مرت من هالمكان
******************

هون بتلاقي

*******************
المصادر:
– موقع: الحدث
– موقع: صحيفة عكاظ
– موقع «الشرق الأوسط»
– موقع:  المواهب الفوتوغرافية – يحيى مساد.
-موقع : مجلة التشكيل (جمعية الإمارات للفنون التشكيلية).
موقع: سكاي نيوز عربية
– موقع هيبا: www.hipa.ae
– موقع: الراية
– الإتحاد العربي للثقافة
– مجلة العربي الكويتية الورقية.
– موقع: مصراوي.
– موقع الجزيرة .نت
– موقع تلفزيون سورية
– موقع (اليوم السابع)
– موقع: الرأي ميديا
– موقع : العربية .نت
– موقع الجزيرة .نت
– موقع النهار العربي
– دبي، الإمارات العربية المتحدة (CNN)
– موقع القدس العربي
– موقع الشرق الاوسط
– مجلة الحرف والكلمة
– الإتحاد العربي للثقافة
– موقع :صحيفة سبق الإلكترونية.
– دبي، الإمارات العربية المتحدة (CNN
.bbc /arabic
– موقع موزاييك
–  جريدة الدستور
– موقع العربي الجديد
– سكاي نيوز عربية – أبوظبي
– موقع سبق- اليوم السابع
– الإمارات اليوم
– العربية .نت – الرياض
-صحيفة الثورة السورية
– موقع المصرى اليوم
– مواقع تواصل إجتماعي – فيس بوك – ويكبيديا
– مجلة فن التصوير
– إيليت فوتو آرت: https://elitephotoart.net
*************