الأديب الكبير أنيس منصور حكى عن واحدة من الجلسات اللي جمعته بـ سيدة الغناء العربي أم كلثوم، وقال إنها وافقت تحكيله رأيها الصريح في نجوم زمانها… بس بشرط:
أم كلثوم: “اتكلم براحتك… بس الكلام ده ما يتنشرش غير بعد ما أموت. وأنا هقولك بصراحة عشان إنت بلدياتي.”
أنيس: “ربنا يديكي الصحة والعمر يا ست.”
وبدأت الجلسة…
شادية: “دي صوت مصري خالص… بنت بلد كده، ولازم أول ما تسمعها تحبها.”
صباح: “صوتها مميز… بس ساعات بتضيع نفسها. ولازم تشتغل أكتر، لأنها لما تنزل من نظر الناس صعب ترجع.”
وردة: “ربنا مديها صحة وصوت… بس تحسها ساعات بتندمج زيادة وتخرج عن السيطرة.”
نجاة الصغيرة: “كانت عاجباني وهي بتختار ألحان مناسبة لصوتها… دلوقتي بقت تقبل ألحان أعلى من إمكانياتها، وهي أصلاً صوتها مش للطبقات العالية.”
عبد الحليم حافظ: “مجتهد… وزكي.”
محمد عبد الوهاب: “ده حد بيمشي مع الزمن… وألحانه لها روح خاصة.”
بليغ حمدي: “الواد ده… شيطان موسيقى. بيجيب جُمل ملهاش مثيل.”
فريد الأطرش: “مش فاهمة ليه مصرّ يدخل الموال اللبناني في الغنوة المصرية… بس عمومًا ألحانه كويسة.”
رياض السنباطي: “ده مش بيلحن كلمات… ده بيلحن معاني! وده مش عند أي حد.”
شريفة فاضل: “صوت جميل.”
فيروز: “صوت مميز وإحساسها عالي… بس جسمها مش مندمج مع الغنوة، تحسها تمثال جميل بيغني.”
فايزة أحمد: “أعظم صوت نسائي… ينفع يتفصل عليه أي لحن وتغنيه بإتقان.”
ولما سألها عن أفضل صوت رجالي قالت بدون تردد:
محمد قنديل.
ده جزء من حوار نادر بين أنيس منصور وكوكب الشرق أم كلثوم… شهادة من الزمن الجميل على عمالقة الغناء اللي صنعوا تاريخ الفن العربي.
