♦ سنة 2013 جورج كلوني عمل حركة مجنونة بس كلها جدعنة
جمع 14 من أقرب صحابه، الناس اللي وقفوا معاه زمان قبل ما يبقى مشهور، وادّى كل واحد فيهم مليون دولار كاش!
آه والله… مليون دولار في شنطة سفر !

✦ القصة بدأت في عزومة عادية في بيته و حط قدامهم أكل، و وسط الهزار، و الذكريات اتكلم عن حاجات شخصية زي إنه اتعلم التمثيل في مسلسل ER، و انه وقع فى حادثة موتوسيكل طلع منها بمعجزة.
وفجأة كده ، كلوني سلّم كل واحد شنطة.
و لقوا فى الشنط مليون دولار قدامهم!
و اتخضوا من الصدمة.

✦ كلوني قال لهم إن ده شكر ليهم لأنهم وقفوا معاه زمان لما كان مفلس، و كانوا بيسلفوه فلوس و يصبروا عليه ، وبيخلّوه يبات فى بيوتهم على الكنبة لأنه ماكانش لاقي مطرح ينام فيه و كانوا بيزقوه يكمل ورا أحلامه .
وهو قرر يديهم من فلوسه و كمان دفع الضرائب عن المبلغ كله

✦ يعني ال 14 مليون اللي ادهالهم، دفع عنهم الضرايب كمان علشان الفلوس توصل لهم كاملة من غير ما تنقص.
وفي الوقت ده، كلوني ماكانش متجوز ولا عنده عيال، فبدل ما يحوّش الفلوس قرر يوزّعها على صحابه اللي شايف إنهم سبب نجاحه.

✦ جورج كان وقتها بيصور فيلم “Gravity” مع ساندرا بولوك و الإنتاج ماكانش متوقع إن الفيلم يكـسر الدنيا بالشكل ده، فادّوه نسبة من الأرباح بدل المرتب.
و الفيلم قلب الدنيا وكلوني مسك ملايين، فقرر يعمل بيها خير مع صحابه.

✦ وقال جورج كلونى ليهم :
” من غيركم مكنتش وصلت لأي حاجة. وإنتو أصحابي لآخر العمر. يعني لو خبطتني عربية، إنتو كلكم في الوصية بس انا قلت لنفسي ليه أستنى لما عربية تخبطني؟ خدوا الملايين دى دلوقتي!”

✦ و رفع خريطة وقال لهم: “بصوا على البلاد اللي رحتها وكل اللي شُفته ده كله بسببكم و عشان كده أهو مليون دولار لكل واحد.”