مشيت على الأشواك للأبنودي وعبد الحليم .كتبت ولحنت في نفس اليوم
مشيت على الأشواك للأبنودي وعبد الحليم
القعدة كانت حلوة في بيت عبد الحليم حافظ، كل أصحابه قاعدين معاه ومنهم :
بليغ ومرسي جميل عزيز ومجدي العمروسي ومحمد الموجي والأبنودي،
الكل كان رايق وبيهزر ويضحك
عبد الرحمن الأبنودي من ضمن الضحك والهزار لما جت :
سيرة أغاني عبد الحليم :
إللي بتظهر في آخر الأفلام بتاعته قعد يسخر منها ويتريق عليها،
حاجات من نوعية جبار وغنيلي لحن الوفا مكانتش بتعجب الأبنودي وشايفها سلق بيض ومعمولة عشان تترص في الأفلام وخلاص
-عبد الحليم مكانش عاجبه الكلام وقاله يا أبنودي الأغاني دي كتبها فنانين كبار
=الأبنودي قاله يا حليم كبار أو صغار ميهمنيش، إللي هاممني في الموضوع إنها مكتوبة بدون إحساس ومعمولة عشان قرشين وحشو وخلاص
-عبد الحليم قاله يا أبنودي إنت متعرفش تعمل حاجات زى دي،
تفهم إيه انت في الإحساس والحب والكلام الشاعري يا بتاع عدوية، إنت راجل بتاع شعبي وبس
=الأبنودي قاله والله لو عاوز أكتب دلوقتي حاجة من دي حكتبها وانا قاعد معاك حالا وبدون تفكير ولا ترتيب،
ولو أنا بتاع الكلام ده كنت حشتري بفلوسهم بيتين ملك
-حليم قاله ماشي أحب أشوف،
وبوعدك براهنك أدام الموجودين لو كتبت حاجة زى جبار حديلك الفلوس إللي عاوزها ومش حناقشك
عبد الحليم كان عارف إنه بيستفز شاعر، واستفزاز شاعر زى الأبنودي أكيد حيخرج منه حاجة كبيرة
الأبنودي سخن وقام ساحب سيجارة حاططها في بؤه وقام وقف وقعد يتمايل يمين وشمال بسخرية وكل الموجودين بيضحكوا
قام الأبنودي وهو بيترقص قال:
مشيت على الأشواك
وجيت لأحبابك
لا عرفوا إيه وداك
ولا عرفوا إيه جابك
حتى في أحضان الحبايب شووووك يا فوزي
عشان ينفجر كل إللي قاعدين من الضحك إلا واحد بس فيهم هو عبد الحليم إللي قال للأبنودي هو انت بتهزر،
هو الكلام ده تريقة وسخرية؟
والله يا أبنودي ما انت خارج من هنا إلا وانت مخلص الأغنية دي
الأبنودي إللي كان بيتريق حس إن الحكاية دخلت في الجد قام مطلع ورقة وقلم وكتب المذهب،
والموجي أخده ولحنه لحد ما الأبنودي خلص باقي الأغنية كلها بالكامل ولحنها الموجي في قعدة واحدة
عشان تتغنى واحدة من أكتر الأغاني الأيقونية الحزينة في تاريخ الفن
وتتغنى في آخر أفلام عبد الحليم حافظ وهو فيلم أبي فوق الشجرة
كسب الأبنودي الرهان وفاز بأعلى أجر تقاضاه طول حياته وقتها عن الأغنية
وخسر عبد الحليم الرهان لكنه كسب ومعاه جمهوره ومحبيه أغنية عظيمة من
أجمل الأغاني إللي غناها طول حياته 💙💙
*******