لكتابة السيناريو،كوينتن تارانتينو المخرج يقدم 7 نصائح

لكتابة السيناريو،كوينتن تارانتينو

7 نصايح عن كتابة السيناريو  من المخرج والسيناريست كوينتن تارانتينو:

1- أسرق من كل الناس:

ترانتينو ليه مقولة مشهورة بيقول فيها إنه بيسرق من كل الأفلام اللي اتعملت قبله،

هو الحقيقة مبيسرقش بالمعنى الفعلي،

بالعكس أفلامه دايماً فيها طريقة سرد وطبيعة مختلفة،

بس هو بياخد أكتر قصص بيحبها أو أكتر نوع فيلمي بيحبه و بعدين يصيغ بطريقته المختلفة.

2- اكتب زي ما الناس بتتكلم في الحقيقة:

في الحياة الطبيعية الناس بيقول اللي يقصده بشكل مباشر،

ساعات بنحاول نجمّل الكلام، وساعات بنقول كلام واحنا مش قاصدينه،

وساعات بنقول كلام فاضي ملوش معنى،

تارانتينو من أفضل كتاب السيناريو اللي بيكتبوا الحوار بشكل طبيعي وواقعي.

3- حِب السينما بجد:

النصيحة دي على قد ماتبدو بديهية، ولكنها مهمة جداً، تارنتينو مكنش بيدرس السينما في مدرسة أو معهد متخصص،

هو حب السينما من الفرجة عليها،

وفي النصيحة دي بيقول انك كسيناريست مش لازم تعرف التيمات و طرق السرد و الانواع للافلام،

انت كل اللي عليك انك تحب السينما وتتفرج كتير وساعتها فعلاً هتعرف تكتب فيلم حلو.

4- خلي عندك سبب قوي انك تبقى سيناريست:

تارانتينو بيقول انه بيحب بيحب يعمل افلام تخلي الناس اللي يشوفوها عايزين يعملوا افلام هم كمان!

و إن ده السبب اللي خلاه اصلا عايز يبقى مخرج،

و النصيحة انك كسيناريست لازم تخلي عندك سبب مهم عايز تحققه من خلال سيناريوهاتك.

5- مش لازم تلتزم بالنوع:

تارانتينو في نصيحته بيقول انه مبيحبش يلتزم بالانواع الأساسية في كتابة الفيلم،

وبيحب يروح للأنواع الفرعية، فا مثلاً فيلم Reservoir Dogs هو فيلم سرقة بس مبنشوفش فيه السرقة أبدًا،

ونصيحته انك كسيناريست لازم تجدد وتكتب حاجة مختلفة حتى لو هتخرج برا النوع او هتعمل ميكس بين أكتر من نوع فيلمي.

6- اقرا السيناريو بصوت عالي:

بعد ماتخلص السيناريو اقراه بصوت عالي لأصحابك أو لفريق العمل اللي بتشتغل معاه،

القراءة بصوت عالي بتخليك تاخد بالك من الحاجات اللي ممكن تتظبط او تتشال.

7- متديش كل حاجة للمشاهد بسهولة:

من أهم نصايح تارانتينو إن صانع الأفلام مش المفروض يأكل الفيلم للمشاهد بالمعلقة،

بمعنى إنك كسيناريست يادوب ممكن تكتب دلالئل أو رموز معينة وتخلي المشاهد هو اللي يستوعبها ويفهمها لوحده من غير ماتشرح كل حاجة لأن ده بيقلل من متعة المشاهدة.

قولي إيه أكتر فيلم بتحبه من أفلام تارانتينو؟

#الحبكة

************