إلياس الحاج
الفنان والمخرج النبيل أسامة السيد يوسف ” أبو نجيب الحبيب ” في ذمة الله .
1961 – 2026
– أي لأ .. تخنتها ( على قول أبو نجيب عادة في تعليقاته ) ..
– يا سيدي تخنتها وكترت .. شو بدي قول للناس عنك .. تواعدنا نلتقي بلوكيشن ” موقع تصوير ” مسلسل بيت الياسمين .. رحت وما لقيتك .. ودقيتلك موبايل .. وينك ؟! .
– حظي سيء .. كنت وخلصت قبل شوي .. بكرا أكيد منتعشا سوا.
– أي لكان رح أفضحك وإلهن عزمني عالعشا وهرب .. قصدي رحت لباريك .
– قول اللي بريحك ..
– ما بسترجي .. شو ما قلت عنك ما حدا رح يصدقني.
– عم تمزح أبو الليس .. ما بتعملها خالي ( هيك عادة بيرد مع ضحكة خفيفة وبحة صوته الغير شكل )..
– ما بيطلعلي معك .. أصلاً شايفك كيف عم تضحك هلأ من فوق .. روحك اللي ياما ضحكت من قلب مهموك معنا .
– من أصلك الطيب أبو الليس .. ( هيك بالعادة بيجاوبني ) .
– أنت الأحسن أبو نجيب .. ما حدا عرفك إلا وبيعرف عالأقل شغلتين تلاتة عنك ” كرم محبتك وفورسية نبلك مع كل الناس .. وكرم يدك وشهاماتك بكل مطرح بتنوجد فيه ، وتواضعك وغيرتك عأهلك وناسك ومحبينك ، شغفك المجنون بالفن …. ” .
– بلوة وابتليناها .. سيدي ما حدا بياخد معه غير أعماله .
– مو وقت هالحكي .. أي من كام يوم كنا سوا باللادقية .. سهرنا .. ضحكنا .. غنينا .. لك رقصنا ..
– انبسطت كتير بهالكام يوم .
– ووتواعدنا نكمل بالشام ..
– ما حدا قال غير هيك .
– طيب .. وين تركتنا ورحت ؟! ..
– دخيل عينك لا تزعل مني أبو الليس..
– زعلت ومشي الحال .
– شو أعمل يعني إذا خلصوا مياتي من هالدنيا.
– لا تقولها ..
– قلتها وخلص.. وعلى قولتك ” مشي الحال “..
– عم تمزح .
– ترحموا علي خالي .
أحاسيس مقلقة انتباتني تجاه الحبيب ” أبو نجيب ” يوم كنا قبل وقت قصير على العشاء في اللاذقية.. نعم مقلقة وغبية لأنها باغتتني بأفكار تشاؤومية .. ولم أفصح عنها كونه يردد دائماً أنه يتفائل بوجودي .. وأكثر ما شغلني عن تلك الأحاسيس والأفكار أنني كنت أراه بنشوة السعادة المتمازجة بتثاقل الحركة وهو يعبر بكل لحظة عن سعادته بيننا .. عن محبته .. مودته للجميع .. حتى عندما انتقلنا من العشاء إلى مكان آخر شعرت بسعادة أكبر وهو يركب إلى جانبي بسيارتي ونحن في طريقنا إلى أحد محال حلويات كنافة أم النارين.
– ما بصير إجي عاللادقية وما أطرق كنافة .
– صحة وعوافه .. هلأ بس نوصل كول بدل الصحن تنين .
– ما حدا بياكل غير نصيبه ( وضحك ) .
– شو قصتك مو على بعضك .
– ليش في حدا منا على بعضه .
– اليوم .. أنت وعم تسألني عن ولادي وتحكيلي عن ولادك الله يحميهن ويفرحهن على قد محبتك إلهن حسيتك متدايق .
– خليها بالقلب .. أهم شي أتطمن عن ولادي ” نجيب وماسية ” .. عم تتواصل مع رفيقنا المشترك .
– الأصيل متلك وأبن النعم ما بينقطع حبل الود معه .
– هاد أبو الليس .. من طول عمرك هيك.
من طريق رأس الشمرة إلى مكان قريب من بيتي في حي مارتقلا .. رجعنا بالحديث إلى أيام دراسته وتخرجه من المعهد العالي للفنون المسرحية .. عن لقاءاتنا المتكررة في حلب يوم كان مديراً لمسرحها .. دعواته المتكررة إلى مدينته التي عشق حجارتها وناسها إداب .. سهراتنا والأعمال التي جمعتنا في حياتنا الدمشقية .. عن تعلقه في البحر وموعده معه في كل عام .. كل ذلك ويرافقه فقد كبير بدواخله .. فقد للناس .. للشغل الحقيقي .. للفرح الحقيقي .. حاولت أن أهرب من نظراته الحزينة وكأنه يقول في كل لحظة .. ها أنذا أودعك .. ربما كانت آخر لقاءاتنا .. وأكلنا الكنافة .. وطرق صحنين ” جعله ألف صحة وهنا “..
** في عشاء اليوم الثاني باللاذقية .. لفتني الصدوق أسامة في منتصف السهرة كيف سارع ومن دون تردد إرسال طبق من الموالح .. ثم طبق من الخضار .. ثم طبق كبير من اللحوم المتنوعة ضيافة منه إلى جيران طاولة التف حولها أشخاص يعرفونه كنجم محبوب جماهيرياً .. وهو فقط عرف أنهم أصلاء من أهل مدينته الحبيبة إدلب فطلبوا أن يلتقطوا بعض الصور معه .
أسامة الوفي لكل من التقى معك ولو مرة .. حتى إذا خلص .. ومتل ما قلت مشي الحال .. بظن كتار بيوافقوني إنك عشت وأنت عم تكابر على أوجاع غير معلنة .. وإنك والأهم كنت مصدر سعادة ودروس بالمحبة والأصالة لكتار ومع كل مين عرفك .
الله معك والغصة قاتلة .. ولو رحت ما بتروح ….. كلنا منحبك ورح نبقى نحبك وأكتر .. على قد محبتك وفروسيتك …
تغمدك الله برحمته الواسعة وأسكنك فسيح جنانه … تعازينا القلبية لعائلتك .. للغالي نجيب والغالية ماسة … لكل حدا عرف معنى وطعم محبتك وطيب أصلك .
***
• مسيرة أسامة السيد يوسف:
– بدأ العمل الفني منذ تخرجه من المعهد العالي للفنون المسرحية بامتياز ونال المركز الأول سنة 1983 ، ومستمر حتى الآن حيث يصور دوره في مسلسل ” بيت الينسمين ” لرمضان 2027 .
– عين منذ عام ٢٠٠٣ حتى عام ٢٠١٦ مديرا للمسرح القومي في حلب، كما أقيمت العديد من المهرجانات الدولية في عهده منها: مهرجان المحبة في طرطوس، ومهرجان الشباب الدولي للفرق المسرحية في مدينة إدلب، وحلب، ومهرجان دمشق، ومهرجان اللاذقية الدولي وكانت برئاسته.
وبالطبع أنجز الكثير من الأعمال الفنية ودورات اعداد الممثل..وشارك في العديد من المهرجانات العربية والدولية .. وكرم وحصد الجوائز.
من أعماله :
مسلسل “مسافة أمان” عام ٢٠١٩، قام بدور الخاطف.
مسلسل “كونتاك” عام ٢٠١٩.
مسلسل “حكم الهوى” عام ٢٠١٧، قام بدور حازم.
مسلسل “شبابيك” عام ٢٠١٧، قام بدور نزار.
مسلسل “عطر الشام” عام ٢٠١٦، قام بدور سميح.
مسلسل “الندم” عام ٢٠١٦.
مسلسل “بلا غمد” عام ٢٠١٦.
مسلسل “حارة المشرقة” عام ٢٠١٥.
مسلسل “الهروب” عام ٢٠١٢.
مسلسل “رفة عين” عام ٢٠١٢.
مسلسل “المنعطف” عام ٢٠١١.
مسلسل “طالع الفضة” عام ٢٠١١.
مسلسل “يوميات مدير عام” عام ٢٠١١.
مسلسل “أهل الراية (الجزء الثاني)” عام ٢٠١٠.
مسلسل “حضارة العرب” عام ٢٠١٠، قام بدور البيروني.
مسلسل “باب المقام” عام ٢٠٠٨، قام بدور رزوق.
مسلسل “فجر آخر” عام ٢٠٠٧.
مسلسل “أعيدوا صباحي” عام ٢٠٠٦، ظهر كضيف شرف.
مسلسل “أهل المدينة” عام ٢٠٠٤، قام بدور سعيد.
مسلسل “أنا وعمتي أمينة” عام ٢٠٠٣.
مسلسل “حروف يكتبها المطر” عام ٢٠٠٣.
مسلسل “حد الهاوية” عام ٢٠٠٢.
مسلسل “الجدور تبقى خضراء” عام ٢٠٠٢.
مسلسل “صقر قريش” عام ٢٠٠٢.
مسلسل “العبابيد” عام ١٩٩٧، قام بدور شاكي.
مسلسل “صلاح الدين الأيوبي” عام ٢٠٠١، قام بدور سعد الدين مسعود.
مسلسل “مرت عمو ما حدا غريب”.
مسلسل “طرة ولا نقش” عام ٢٠٠٧.
مسلسل “أسير الانتقام” عام ٢٠٠٧.
مسلسل “حوش العيلة” عام ٢٠٠٧.
مسلسل “البيوت أسرار”.
مسلسل “المفتاح” عام ٢٠١٢، قام بدور نبيه زوج ميساء.
مسلسل “خان الحرير” عام ١٩٩٦، ١٩٩٨، قام بدور نعيم.
مسلسل “شام شريف” عام ٢٠٠١.
مسلسل “سيرة آل الجلالي” عام ٢٠٠٠، قام بدور قصي.
مسلسل “نوار” عام ٢٠٠٠.
مسلسل “أيادي في الظلام” عام ٢٠٠٠.
مسلسل “الحقد الأبيض” عام ١٩٩٨.
مسلسل “صهيل الألم” عام ١٩٩٤.
مسلسل “سكان الريح” عام ١٩٩٢.
مسلسل “اختفاء رجل” عام ١٩٩٢.
مسلسل “العروس” عام ١٩٩٢، قام بدور عزو.
مسلسل “حرب السنوات الأربعة” عام ١٩٩٠، قام بدور ستريت.
