الزمن غابه…..!
قصيدة شعبية
شعر: مسلم الطعان

عمري طير إبغابه وحشه
شتا الدنيا
هوَّ يرجفْ وآنه أرجفْ
وضاع ريشه وضاع هدمي

شفتْ روحي موش روحي
او دمّي يبچي
ادموعه دمْ اشماله دَمّي…؟!

كًلتْ أدكً بيبانْ صبري
بلكي تنطيني صبر
بابْ غيري:
عنده هَمْ ماهو هَمّي

او شفتْ صبري:
ساد بابه
ملتهي ايدخنْ عذابه
فكره غايبْ ماهوْ يَمّي

عمري طير بغابه وحشه
او شتا الدنيا..،
حيلْ يرجفْ وآنه أرجفْ
وضاع ريشه وضاع هدمي

الزمن غابه
غابه وحشه
ومن قريت أغصاني بيها
ضيعيتْ إخيوط حلمي

الزمن غابه
غابه وحشه
احروفي بيها أشجارْ خرسه
شفتْ بيها احروفي خرسه
وبعد ما وّچَدِتْ إسمي

ابلهفة أعمى
دوّرت لمسة دفو
عمري غابه
غابه ظلمه
وين حنيَّة إديها
التمسحْ أحزاني إبدمعها
ومن تسولفْ يضوي نجمي؟!

عمري إبعازة دفو
وين حنيّة جمرها؟
وين راحت؟
عني شالتْ؟ وينها أمّي؟!

عمري غابه
غابه ظلمه
إبلهفة أعمى:
دوّرتْ لمسة إديها
وين حنيَّة إديها
التمسح أحزاني إبدمعها
ومن تسولفْ يضويْ نجمي؟!
16/12/2018
صومعة السومري الغريبب في الكوفة