دلع ممدوح الرحبي، غير إنها ممثلة وخريجة المعهد العالي للفنون المسرحية، وكاتبة كتبت مسلسلات الفصول الأربعة وعصي الدمع، هيي كمان محامية وتخرجت بتفوق من كلية الحقوق.
لهيك المسلسل الكامل الوحيد يلي كتبته، عصي الدمع، ناقش قضايا حقوقية مهمة كتير بالمجتمع السوري، وتحديدًا قانون الأسرة والغبن يلي فيه ضد المرأة، سواء بقضايا الطلاق أو النفقة، وحكى المسلسل عن هالمعاناة بطريقة رائعة جدًا.
وقبل هيك كان في حلقة بـالفصول الأربعة فينا نعتبرها مقدمة لـعصي الدمع، وهي حلقة “للنساء فقط”، يلي كتبتها دلع الرحبي وحكت فيها عن قوانين الطلاق التعسفي والحضانة والعنف ضد المرأة.
للأسف كل هاد الشغل راح عالفاضي، لأنه لو فتحتوا الأخبار وشفتوا الواقع السوري بأي وقت من الاوقات سواء سابقاً او حالياً ، كل يوم رح تلاقوا خبر عن عنف ضد المرأة، وجرائم قتل على خلفية ما يسمى “الشرف”، وخطف صبايا… إلخ.
