بالنسبة للكون، فالضوء ليس إلا رجل عجوز يمضي ببطئ.
.
الضوء ده سريع جدا بالنسبة لينا، بشكل لا يصدق، يلف الأرض كلها سبع مرات ونص في ثانية، رغم ذلك لما نبص للنجوم في السما فاحنا بنشوف ماضيها من آلاف السنوات، لأنها بعيدة جدا لدرجة إن الضوء على ما يسافر منها لينا بياخد كل تلك المدة!
.
عشان تفهم الفكرة دي خلينا نتخيل أن فيه حادث مؤسف حصل، وفاة أحد الأقارب في الصعيد، بس فيه مشكلة وهي أن مفيش تليفونات أو اي طريقة نوصل الخبر ده للأقارب في القاهرة، فحد من العيلة هيطلع من الاقصر الساعة 9 مساءًا بالقطر يوصل تقريبا تاني يوم قبل الضهر يقول للناس في القاهرة الخبر، لما بيوصلهم الخبر الساعة 11 قبل الظهر مثلا بيحزنوا طبعا، بس طوال الـ 14 ساعة اللي فاتت -رغم أن هذا الشخص مات بالفعل- مكانوش عارفين أنه مات، الضوء كده برضه، عبارة عن خبر يأتينا من الأجرام السماوية البعيدة، فلو فيه شيء بعيد جدًا جدًا على مسافة 2.5 مليون سنة ضوئية، فده يعني أن الخبر (الضوء) هيطلع منه ويفضل تسافر لمدة 2.5 مليون سنة لحد ما يوصل لينا هنا، نقوم نشوفه.
.
في الصورة المركبة المرفقة تجد مجرة أندروميدا، جارتنا الاقرب، وهي قريبة لدرجة إنك ممكن تشوفها بعنيك في ليلة حالكة، لما بنتكلم عنها بنقول “هناك اهيه”، لكنها تبعد عنا مسافة 2.5 مليون سدنة ضوئية.
.
بالنسبة لهذا الكون الشاسع، فده فيه ميزة لينا، تخيل مثلا انك بتشوف دلوقت بتلسكوباتك مجرة على مسافة أكبر من 13 مليار سنة ضوئية، ده معناه إن المجرة دي نشأت بعد الانفجار العظيم علطول، وبكده تقدر وانت هنا على الأرض سنة 2026 تدرس المجرة دي لما كانت لسه طفلة صغيرة.
.
الضوء سريع بالنسبة لينا، وبالنسبة لكل جرم منفرد في هذا الكون، لكن بالنسبة للكون نفسه كوحدة واحدة، فهو بطيء كرجل عجوز يعبر الشارع! يخرج من مجرة ما، فننتظر لملايين ومئات الملايين من السنوات حتى يصل لنا، لكن ما هي ملايين السنوات؟ ماهي برضه بالنسبة لهذا الكون ليست إلا لحظة، وما عمرك يا صديق إلا لحظة، بل أقل من لحظة، فقط تأمل قليلا.

#شادي عبد الحافظ#مجلة ايليت فوتو ارت.