حرق الاسعار في مجال التصوير بين مؤيد و معارض.
تعرف ان حرق الاسعار بيأثر عليك انت شخصيًا ؟!!! 🤔

حرق الاسعار هو مصطلح يشير الي تقليل السعر او اعطاء العميل سعر رمزي بحيث المصور يشتغل اكثر او يجذب عملاء اكثر للحجز معاه.
و الحقيقة كل واحد حر لكن اتمني تقراوا المقال ده للنهاية.

لو حضرتك لسه بتبدأ فانت بحاجة لتكوين portoflio (و هو عبارة عن مجموعة من افضل صور قمت بتصويها و الغرض منه هو عرضه علي العميل او استخدامه في التسويق لشغلك )، عندك كذا طريقة لتكون الportoflio لو لسه بتبدأ.. من ضمنهم:
١- العمل مع مصور اكثر خبرة في المجال بشكل مجاني او بشكل رمزي مع اشتراط ان الصور اللي هتلتقطها يبقي لك الحق في وضعها في البورتوفليو الخاص بك(و ده بالاتفاق مع العميل و المصور الاكثر خبرة منك اللي شغال معاه و ده بشكل مُسبق ).
٢- ابدأ بعرض خدماتك علي من حولك بشكل رمزي او مجاني (مع اخذ اذن ان الصور تُضع في ال portfolio الخاص بك و يحق لك استخدامها في التسويق لشغلك)، (من حولك) يعني مثلاً اصحابك، حد من عائلتك، او model يبحث عن مصور مقابل داتا.
٣-اخر نقطة هي حرق السعر، بمعني انك تقلل سعرك للحصول علي حجوزات اكثر او لجذب عملاء ذات فئات اقل. و ده حريتك الشخصية لكن خليني اوضح لك كذا نقطة:
-عند تقليل سعرك فده هيأثر عليك في المستقبل، و هيأثر علي المصورين ذات الخبرة الاعلي في المجال، و هيأثر علي سرعة تطورك من حيث شراء مُعدات افضل، و هيأثر عليك من حيث مُعدل استهلاك المُعدات، و هيأثر علي قيمة المجال نفسه.
(تعالي نمسك نقطة نقطة بالترتيب ) :

١-هيأثر عليك في المُستقبل؛ يعني مثلاً تخيل انك اشتغلت مع عميل النهاردة ب ١٠٠٠ جنيه مثلاً، و بعد سنة نفس العميل كلمك (مع وضع في الاعتبار ان سعر المُعدات في السنة دي قد يكون زاد كذا ضعف)، هل هتقدر تقول للعميل ان سعرك زاد جداً وصل الي ١٠،٠٠٠ مثلاً ؟ هل العميل اللي بتتعامل معاه هيفهم ان المُعدات سعرها زاد او انك استثمرت في مُعدات افضل او انك اشتغلت علي نفسك اكثر في المُدة دي ؟؟
اعتقد انك هتواجه صعوبة كبيرة في اقناعه، خصوصًا لو انت مفهمه انك واحد عندك خبرة كبيرة جداً من البداية زي ما اغلب المصورين بتعمل عشان تاخذ شغل.
هيأثر عليك ايضاً في المستقبل لو الموضوع انتشر و ناس اكثر في محيطك قرروا يعملوا زيك عشان يشتغلوا، لان السعر المُنتشر هيبقي قليل. و بالتالي هيتم التعامل معاك علي انك نصاب لو طلبت سعر اعلي يناسب خبرتك 😉

٢-هيأثر علي المصورين ذات الخبرة الاعلي
لان سعر السوق بقي منخفض في حين ان خبرتهم و معداتهم عالية فمش هيلاقوا عميل يوافق بالسعر العالي بسهولة.
٣-هيأثر علي سرعة تطورك من حيث شراء مُعدات افضل و بالتالي هيبقي عندك فرص اقل للوصول للعميل الa class: بمعني ان مُعدل ربحك هيبقي قليل في حين ان اسعار المُعدات عالية؛ و بالتالي هيبقي صعب تشتري مُعدات افضل تناسب الشغل اللي بيحتاجه العميل اللي من الفئة العالية، حتي الاجار هيبقي صعب بالنسبة للسعر القليل اللي بتاخذه في السيشن .
٤- هيأثر عليك من حيث مُعدل استهلاك المُعدات؛ بمعني انك بتستهلك مُعداتك بصورة اكثر لانك بتحرق سعرك و بالتالي بتشتغل اوردرات اكثر بسعر اقل (عشان تحقق دخل) فبتستهلك عدتك اكثر، و ده في مرحلة ما هيخليك تبقي محتاج تعمل صيانة لمعُداتك( لانك اهلكتها) او تشتري مُعدات جديدة، فهل سعرك الحالي يؤهلك لده؟ و لا هتلاقي نفسك محتاج تشتغل كذا سنة من دون ما تصرف اي فلوس عشان بس تشتري الكاميرا الحالية اللي انت شغال بها ؟🤔
٥- هيأثر علي قيمة المجال نفسه؛ شئت ام أبيت هتلاقي اغلب الناس بتربط الخبرة بالفلوس (يعني تخيل دكتور بياخد ٢٠ جنية في الكشف و دكتور بياخد ٢٠٠ جنيه في الكشف، بعيد عن الشعارات، الناس بتشوف ان اللي سعره اعلي؛ يملك خبرة اكثر او اشطر ). لو جيت تطبق الموضوع في مجال التصوير هتلاقيه قريب من كده؛ بل هتلاقي ان كل الناس جايبين اي كاميرات لانها تحولت لمهنة و ليس فن و بيبيعوا ال٢٠ صورة بعشرة جنيه و مش لازم خبرة خالص ولا دراسة كده كده العميل سعره قليل و المصور سعره قليل و الدنيا شغالة. فمتزعلش لما حد يقول ان التصوير شغلانة من ليس له شغلانة، لانك انت بتساهم ان التصوير يطلع من اطار الفن الي سبوبة سواء بتعاملك مع العميل او بتقديرك الخاطئ لفنك.

عشان تشتغل صح ادرس كتير و خذ خبرة من حولك، كون portoflio جيد، سوق لنفسك جيداً جداً، قيم خبرتك و مُعداتك و خلي سعرك معقول مش قليل جداً ولا عالي جداً، و زود سعرك مع الخبرة. و حاول توصل للعميل اللي فاهم في شغلك

بالتوفيق لحضراتكم 🌹@followers