لماذا لا نربي البومه ؟
دكتور مصطفي محمود بيقول البومة، الطائر المتهم المظلوم أول ما بيسمعوا صوته بينعب في الخرائب بيتشائموا منه،
لكن في الواقع هذا الطائر لطيف قوي ووديع جدا شديد الوداعة، مستسلم، فيه هدوء غريب جدا، وفي حب للإنسان، خادم للإنسان، ممكن تاخده على حجرك كده وتطبطب عليه زي القطة، بس هي قطة بجناحين، وهو خادم للفلاح لدرجة إنه بيطهرله أرضه كلها كده مجانا.
البومة الواحدة بتاكل 5 آلاف فأر في السنة، يعني إذا كان الفلاح عنده 10 بومات ممكن تاكل 50,000 فأر في السنة، يعني يطهروا مزرعة من عدة فدانين مجانا ولوجه الله. وإيه؟ من غير بقى لا أعراض جانبية ولا آثار ضارة ولا فضلات زي حكاية الـ DDT والسموم والحاجات دي.
ووجة البومة نفسه زي ما قلنا لما بنقرب منه بنحس فيه هدوء غريب ووداعة، وهي زي ما قلنا أخلاق القطط فيها يعني صفات أنها ممكن تستانس.
البومة صيادة ليل متخصصة. لو درسنا الصفات اللي فيها نستغرب، يعني مثلا عين البومة أقوى وأحد بصراً من عين الإنسان ب١٠٠ مرة، وتشوف في الظلمة بوضوح تام.
العدسة جوة العين هنلاحظ إن هي شديدة التحدب، وده بيديها قوة بؤرية مضاعفة. الشبكية في عين البومة لو خدناها مليمتر واحد من الشبكية نلاقي فيه 56 ألف نقطة حساسة. وفي الشبكية عدد هائل من أعضاء الرؤية في الظلام اللي بيسموها رودز.
عين البومة ثابتة في المحجر مابتتحركش، وهي بخلاف جميع الطيور العينين الاتنين كده أماميين، بينما كل الطيور عين هنا وعين هنا، إنما دي عينيها الاتنين قدام كده. ورغم أن العيون ثابتة في المحجر كده، إلا أن البومة بتعوض الحكاية دي بحركة الدماغ كلها، ممكن دماغ البومة تلف 250 درجة
لما نجي للودان نلاقي حاجة عجيبة قوي، الودان لها ظرف تفتح وتقفل، ثانياً الودنين ما هماش في موضع تناظر، بيبقى دايماً واحدة عالية شوية وواحدة واطية شوية، وده بيخلي البومة تعمل حركات معينة الحركات الشهيرة بتاعه البومة دي،،،،، الحركات دي بتعملها عشان تعوض فرق التناظر بين الودنين، وأكن عندها كمبيوتر جوه بيحسب مكان الصورة السمعية بالضبط ومكان الخروشة فين فتنزل عليه، أكنه رادار. وعندها قوة سمع غير عادية.
الأجنحة عجب، أجنحة كاتمة للصوت مكسية نوع من الفراء الحريري ولها أهداب، وفيها لمعة خاصة تمتص الأمواج، وفيها صفة خاصة في نفس الريشة دي تمتص الأمواج الصوتية، فتكون النتيجة أن طيرانها ساكت ميتسمعش خالص.
سبحان من خلق فأبدع
#شيماء مصطفى#مجلة ايليت فوتو ارت
