في العشرينات ظهرت مفيدة محمد غنيم….

اللي اتعرفت بعد كده باسم عزيزة أمير، الممثلة.

كانت بتحب التمثيل ونفسها تمثل،
واحد صاحب أبوها كلم يوسف وهبي،
وطلب منه يديها فرصة على المسرح.

وفعلًا يوسف وهبي وافق،
واختبرها واقتنع بيها،
ومن أول مرة إداها بطولة مسرحية،
وبعدها بطولة تانية، وبدأت تبقى نجمة مسرح.

لكن المسرح ما كانش حلمها،
عينيها كانت على السينما.
بعد وفاة أبوها ورثت مبلغ كبير منه
يقدر يبقى بداية إنتاج فيلم،
وكانت فرصة حقيقية تدخل بيها عالم السينما
مش بس كممثلة، كمنتجة كمان.

وكان هدفها تزود رأس المال
علشان تعمل مشروع فني
ومعاه مشروع اقتصادي.

عزيزة راحت بنك مصر…
البنك اللي كان بيأسس صناعات وطنية
وبرأس مال مصري،
وقابلت أهم راجل في البنك… محمد طلعت حرب،
زعيم مصر الاقتصادي،
عشان تطلب منه سلفة.

وكان صديق لعيلتها،
بس بعد ما سمع المشروع رفض يساهم
أو يديها قرض،
وقالها إن دي فكرة مجنونة
ومغامرة كبيرة هتضيع فيها كل ورثها….

مش بس كده،
ده قالها إنه ممكن يطلب من العيلة
بصفته صديق ليها
إنها تحجر عليها
ويمنع عنها التصرف في فلوسها
بحجة الجنون.

عزيزة اتعصبت جدًا من الكلام ده،
وسحبت طلب السلفة،
واعتبرت الكلام ده إهانة ليها،
وصممت على إنتاج الفيلم.

استلفت فلوس مع فلوس ورثها
وأنتجت أول فيلم ليها
“ليلى”،
واتعرض الفيلم يوم 16 نوفمبر سنة 1927
في سينما متروبول،
وعزمت طلعت حرب بنفسها.

الليلة دي…
السينما كانت زحمة،
والناس ما بطلتش تصفيق
بعد ما خلص الفيلم،
وكان أول فيلم روائي طويل مصري.

طلعت حرب اعترف إنه غلط في تقديره للموضوع،
لكن برر تصرفه
إنه كان بدافع الخوف على ورثها،
وقال إنها كانت أبعد نظر منه
وهناها.

وبعد 8 سنين، في 12 أكتوبر 1935،
افتتح طلعت حرب استوديو مصر
اللي بقى صرح اقتصادي وفني،
والصحف ساعتها سمته
هرم مصر الرابع!!!!

عزيزة أمير توفت سنة 1952،
ولُقبت بأم السينما،
وكانت أول سيدة منتجة
ومخرجة عرفتها السينما المصرية.

******************
المصادر:
– مجلة الحرف والكلمة
– الإتحاد العربي للثقافة
– موقع سبق
– موقع الشرق الاوسط
– موقع الجزيرة .نت
– موقع صحيفة عكاظ
– دبي، الإمارات العربية المتحدة (CNN
.bbc /arabic
– موقع (اليوم السابع)
– موقع موزاييك
–  جريدة الدستور
– موقع العربي الجديد
– موقع : – الجزيرة .نت
– سكاي نيوز عربية – أبوظبي
– موقع سبق- اليوم السابع
– الإمارات اليوم
– العربية .نت – الرياض
-صحيفة الثورة السورية
– موقع المصرى اليوم
– مواقع تواصل إجتماعي – فيس بوك – ويكبيديا
– مجلة فن التصوير
– إيليت فوتو آرت: https://elitephotoart.net
*****