لأول مرة في العالم.. محول Megadap M2RF يحول عدسات Leica M إلى أوتوفوكس على كاميرات Canon RF!
أعلنت شركة Megadap عن محولها الجديد M2RF، واللي بيعتبر أول محول في العالم بيحول عدسات Leica M-Mount اليدوية (Manual Focus) لعدسات تركيز تلقائي (Autofocus) على كاميرات Canon EOS R الميرورليس، سواء كاميرات الفول فريم أو الـ APS-C.

بالرغم من إن كانون لسه حاطة قيود على عدسات الفول فريم من شركات الطرف الثالث لنظام الـ RF، إلا إن المحول ده بيقدم حل مميز للمصورين اللي حابين يستغلوا العدسات اليدوية مع أنظمة الفوكس الذكية في كاميرات كانون.

المحول بيعتمد على موتور بيحرك نظام هيلِكال (Helical drive system)، وده بدوره بيحرك العناصر الداخلية جوه عدسة الـ M-Mount لضبط الفوكس.

المحول مش مقتصر على عدسات لايكا بس، بل بيشتغل مع أي عدسة M-Mount، زي عدسات Voigtländer وZeiss الكلاسيكية، وعدسات Light Lens Lab الحديثة.

بيترجم الإشارات الإلكترونية بين الكاميرا والمحول بدقة، وبيدعم تقنية التركيز الشهيرة من كانون Dual Pixel AF، بالإضافة لتتبع العين (Eye detection)، والتعرف على العناصر (Subject detection)، والفوكس المستمر (C-AF).

المحول مزود بمفتاح (AF/MF) للتحويل السريع بين الفوكس الأوتوماتيك واليدوي.

المحول بيقدر يحرك العدسة المترتبة عليه لبره بمقدار بيوصل لـ 4.5 مليمتر، وده بيقلل أقل مسافة تصوير ممكنة للعدسة (اقرب فوكس)، بنفس فكرة عمل أنابيب التمديد (Extension tubes).

فيه ذراع لفتحة العدسة من 4 خطوات عشان يزامن قيمة الفتحة الحقيقية على العدسة مع الرقم المعروض على شاشة الكاميرا، وبيسجل بيانات الـ EXIF (اسم العدسة، البعد البؤري، وفتحة العدسة) لحد 4 عدسات مختلفة.

المحول بيدعم الاستخدام مع محولات تانية، يعني تقدر تحول عدسة بمانت تاني لـ M-Mount، وبعدين تركب الـ M-Mount على الـ RF بواسطة محول M2RF.

مصنوع من الألومنيوم الأسود المؤكسد مع طلاء فضي مط (Silver matte pearl nickel) عشان يناسب التصميم الكلاسيكي لعدسات لايكا. مصمم لشيل عدسات بوزن بيوصل لـ 500 جرام (العدسات الأتقل من كده بتحتاج دعم باليد أثناء التصوير).

بييجي معاه محول USB Type-C لتحديث الـ Firmware وتعديل إعدادات الـ EXIF، وبيشتغل مع أجهزة macOS وWindows.

محول Megadap M2RF متاح حاليا للطلب المسبق بسعر 399 دولار، ومن المتوقع بدء شحنه للمستخدمين قريبا جدا.