
#نصيحة مخرج للي عامل نفسه مخرج
*1. الإخراج مش لقب.
الإخراج مش انك تكتب على البروفايل “Director”.
الإخراج انك تعرف تقول للممثل “اقعد” فيقعد وهو مقتنع.
اللي معاه كاميرا مش مخرج، اللي معاه رؤية هو المخرج.
*2. تعبي في الإخراج.
أنا تعبت عشان أوصل.
قعدت 8 سنين مساعد مخرج، بشيل كراسي وبجيب قهوة وبتعلم.
اترفضت كتير.
اتقالّي “انت مش هتنفع.
سهر الليالي اللي الناس فاكراه سهل، قعدت سنة أذاكر فيه نفسيات 8 شخصيات قبل ما أصور مشهد واحد.
الإخراج تعب، مش شو.
3. ازاي تبقى مخرج بجد.؟
-ذاكر بني آدمين، مش كاميرات: انزل الشارع، اسمع الناس، اعرف هما بيحزنوا ازاي وبيضحكوا ازاي.
- اتفرج 100 مرة قبل ما تصور مرة: اللي مبيتفرجش مش هيعرف يخرج.
- الممثل مش عروسة:* متقولوش عيط قوله “افتكر لما أبوك سابك خليه يحس مش يمثل.
- احترم السيناريو:* لو مش عاجبك الورق، متصورش. المخرج الشاطر بيبان من اختياره للورق قبل الكاميرا.
*4. المخرج والمصور:
المصور مش اللي بيدوس على زرار.
المصور هو عينك التانية.
أنا لما أقول للمصور عايز الكادر مخنوق هو بيفهمني ان الشخصية دي محبوسة ومش لاقية هوا.
لو انت والمصور مش واحد، الفيلم هيطلع مشوه.
قولّه إحساس المشهد، مش تقوله هات كاميرا يمين
اللي بيقول للمصور صور وخلاص ده مش مخرج، ده بيصور فيديو فرح.
*5. المخرج والمونتير:
المونتاج هو الإخراج التاني.
أنا ممكن أصور مشهد في 10 ساعات، والمونتير يخلصه في 10 ثواني أو يبوظه في 10 ثواني.
لما أقعد جنب المونتير، مش بقوله “قص هنا”، بقوله “سيب الناس تحس بالسكوت ده شوية، الوجع هنا محتاج صمت”.
المونتير الشاطر هو اللي بيعرف امتى يقطع وامتى يسيب الكاميرا تحضن الممثل.
لو سبت المونتاج لغيرك، يبقى انت سلمت فيلمك لحد تاني يخرجه بدالك.


