شايفْ دمع ينزرع…؟!
قصيدة شعبية
شعر: مسلم الطَعَان

يلمنزرع بعيوني:
من زغري دمع
شايفْ دمع ينزرِع…؟!

يطحن إفراكًكْ بالضلع
والوّنه يشربها الجمر
ما يرتوي منها اذا ما تنسمع

دكًيت بابْ المستحه
إبدكًة أصابع تايهه إبليلْ الربع
وما رد عليَّه المستحه
وأدري بمساميره أبد ما تنشلع
إبدكًة أصابع تايهه إبليلْ الربع

دكًيت بابْ المستحَه
إبكًلبْ ينزف مستحَه
ويا حنّة إجروحي أطبعتها طبع
بيدي إعلى بيبانْ الكًلبْ:
حنة نذر أحباله ما تنكًطع

وكًالولي الماشين بدروبْ الجرح:
الجرح لو دكًيت بابْ الليلْ:
يكًطر ضواه إوْ يشع

ودكًيت بابْ الليلْ
وكبرت عباة الليل
غطّتني وآنه إبوَضع ماهو وضع
يلمنزرع بعيوني من زغري دمع
خَضرّت كلّي إدموع إلَكْ
شايف دمع ينزرع…؟!!!

السبت الموافق 16/1/2021
الساعة الثامنة مساء
صومعة السومري الغريب في الناصرية