حكايات من فصط حلب ☆ مرايا حلبية 123
💠 شوية حكيات حلبية عتيقة 💠
✴ حتى تكون حلبي !!
▪ لازم تكون صَلَّيْتَ بجامع الصديق، وطلعت اشتريت فستق حلبي من بسطة على بابه..
▪ أو صَلَّيْتَ بكنيسة اللاتين، وطلعت أكلت سابليه من عند فيتا ..
▪ لازم تكون جبت حليب غنم ولبن بيبي من عند الصقال بالجميلية ..
▪ وجبت مونة البيت من عند التبان بالسبع بحرات .. وموصي على بقيتها من عند الحَبّوبْ..
▪ لازم تكون دايق المشاوي من مطاعم بستان كل آب، ومعهم حمص من عوجة الجب ..
▪ لازم تكون آكل هيطلية وبوظة من عند النخيل، وحلاوة الجبن من عند سلورة ..
▪ ولازم تكون آكل بوظة كرز وبوظة شراب اللوز من عند العطار ..
▪ لازم تكون دايق شراب اللوز وغريبة اسطنبلية من عند الصباغ ..
▪ ولازم تكون دايق المرزبان وهريسة اللوز من عند أزرق ..
▪ ودايق المربيات الحلبية من عند الست الأرمنية ..
▪ لازم تكون دايق صندويشات السجق من عند سيرجية، وبعدين من عند سلاف، وفطران فول من عند أبو عبده .. أو مامونية وشعيبيات من عند مهروسة ..
▪ لازم تكون موصي سوربريز من عند نوتوراكي، أو قالب كروكومبوش تحته ميلفيه كمان من عند نوتوراكي ..
▪ لازم تكون حضران عرس نسوان وإكليل بكنيسة، وعرس مختلط وعرس شراكسة ..
▪ لازم تعرف جبضون للفريكة .. والسقطية للكماية .. ومهروسة لغزل البنات .. والخالدية للمقور والمقمع ..
▪ ولازم تكون مغير وجاه الكراسي من عند أقمشة جبسة أو الصباغ، وعندك صالون من عند مسابكي .. وشاري عدة خياطة وتطريز من عند الباذنجكي وراء الجامع ..
▪ ولازم تعرف أنه ناظو للفضة .. وحنيفة للذهب .. وبونجة وعبود للألماس .. وساحة فرحات للذهب الممّوض ..
▪ والإليغانز ونجيب اليان للقماش التقيل ..
▪ لازم تكون صورت صورة شعاعية بعيادة دكتور نورس أو عيادة دكتور فيصل ..
▪ ولازم تكون صلحت سيارتك بالميدان، واشتريت لها عدة من جادة الخندق ..
▪ لازم تعرف خط الفرنسيسكان، وزحمة سوق الإنتاج، ومستشفى التوليد، والعبارة والتلل والعزيزية وسوق المدينة ..
▪ ولازم تعرف معهد حلب العلمي والفرير ومدرسة الأمل .. وتكون شاري مستلزمات المدرسة من مكتبة أطلس ..
▪ ولازم تكون لعبت أولادك بدريم بارك، وشربت أركيلة بالجديدة أو بالقلعة .. وأكلت ذرة مشوية على طريق الفرقان ..
▪ وحتى تكون حلبي لازم تكون كل سيديات صباح فخري بالسيارة ..
▪ وحتى تكون حلبي بتكون سمعان آذان الظهر مع جرس الكنيسة سوا ..
▪ وبتكون داخل لبناية مزينة عالحج وعالكريسمس ..
▪ وحتى تكون حلبي بيكون مر عليك ألف قصة وقصة .. وألف ذكرى وذكرى ..
وحتى تكون حلبي بدك تدفن الجرح بالملح، ومو بس تكبسه لتقدر تعيش حاضرك ..
وتكمل يومك اللي ما بقي فيه شي حلبي .. غير أنت !!
☆☆☆
✴ كان الشيـخ طه عم ياكل بهل (زبديه) من الخضـَره يلي قطفها من البساتين يلي حواليه
(بستان الرز)، و(بستان الباشا)، و(وبستان القصر)، و(بستان كل اب)..
بس بتعرفوا ليش … الشيـّخ طه بياكل خضره كتير لأنه ارتفع عنده (السكري) لدرجة (الأعظميه)،
وما بقى أكتر من هيك، وفجأة سمع صـَوت قام فتح (باب الحديد)، وطلع بوجهه (صلاح الدين)
جاي لعندو بزيارة هو و(الصالحين)، و(سعدالله الجابري)، و(سليمان الحلبي)، و(سيف الدوله الحمداني)، و(شيخ مقصود)، و (شيخ نجار)، وقالولو: يا شيخ طـه هلق كنا مجموعين (بالحلوانية)
ووعدنا بعضنا (بالصاخور)، وصلينا المغرب بجامع نور الشهداء ب(شـَعار)، وجيناك مشـَي مافي (مواصلات)، ورح نروح عند القاضي عسـٌكر لنبشـركن انه بهل يومين راح تسمعوا عل (إذاعة) أخبار تفـرح قلبك، وإنو نـَور (الفرقان) راح يضوي على (قسطل) لقلب البلد، وراح تنفتح أبواب (الفـرج) و(النصر)، وتعم الفرحة من الكبير للولد الصغير..
بس بدنا ياك تذكر الكـَل ..
إنو (سبيل) لهل شي هو (المحافظة) على الإيمان والثبات بالصبر الجميل، وتوكل عل المولى الجليل.. وبإذن الله، وبجاه أبو (الزهراء)، راح تنالوا (الفردوس)، وراح ترجعو العز (المدينة)، وتعمروا (حلب القديمة)، وتضووا (حلب الجديدة)..
وكلو بهون لعيون حلب (الشهباء)
ولا تنسى حجي موعدنا (تحت القلعة)..
☆☆☆
✴ نحن في حلب
أكلنا محاشي وعزايمنا كبب
لغينا اللحمة وخبزنا عالحطب
نحن في حلب
غوانا عقيق ومصاغنا دهب
لبسنا الخيش وتكحلنا بالتعب
نحن في حلب
أهل النسيج وخيوط القصب
المعمل انتهب والتاجر انسلب
نحن في حلب
أهل الأصالة والطرب
صارت أغانينا نواح وفرحنا كرب
نحن في حلب
أهل المعالي والرتب
صرنا أهل الشقا والتعب
☆☆☆
● إمي شوفي برهو دا ياكل من راس الطبخه وأبوي لسا ما اجا عالبيت …
● فريزه … اسكبيلو جنق لأبوك من راس الطبخه وقيميه على جنب .. وخللي برهو ياكل .
● طيب يوم .. معناتا بسكبلو لأبوي وإلنا فرد مره ..
● اي إش عليه، اسكبيلو انت وحطيلا جنق لأختك هلق بتجي هيي وجوزا وولادا ..
● اوهووووو علينا بقى راحت الطبخه ..
● لك بنتي لا تتعلمي البخل سمي بالله واسكبي البركه بالكتره ..
☆☆☆
✴ لما بتدخل عالبيت فارط ومستوي من التعب، وبمجرد ما تدخل بتنسم على أنفك ريحة الطبخ الطيب، وتسمع صوت عبنادي من جوا ميييييين إجا .. يالله غيرو حويجكن الأكل استوى ..
اعريف إنو هي إمك حيت فيك مئات الخلايا اللي كانت ميتة ..
ولما بتدخل على أوضتك لتغير، وبتلاقي الشباك مفتوح على طارو، والأوضه ريحتا بتشهي، وتختك مظبط وتلبيسة مخدتك الوسخه مبدلة ومحططلك حرام جديد .. اعريف انو هي إمك حيت فيك مئات الخلايا الكانت ميتة ..
ولما بتشوفا شافت كلشي مخبيه عنا، وما استقبلتك بقلبان الوش والقتيل .. اعريف انو هي امك موتت فيك التفكير الغلط، وحطت مراية قدامك لتشوف حالك صح ..
ولما بتتفتل بالبيت وبتلاقي كلشي ظابط، ونظرك ارتاح، ونفسيتك التعبانه راقت وصفيت، وشلفت حالك عهالديوانه، وشلحت قندرتك وجرابك .. واجت امك بكل بساطه شالتن وحطتن عند باب الصقاق، وطلعت فيك وتبسمتلك وقالتلك: إن شالله بتكفني عهالعيون ما أكوسن.. قوم عين ماما قوم خسل إيديك مشان تاكل، وبترفع راسك وبتشوف امك بأبهى صورة..
وهالفله مشكوله على شعرا، وهالمباريم بإيديها وبتركد بتلفا وبتبوسا .. اعريف إنو هي امك حركت فيك كل المشاعر بدون ما تشعر .. ريحة حويجا المعطره .. ودفا حضنا اللي بيوسعنا قد ما كبرنا، ودمعتا القريبه وقت البنزعلا وابتسامتا وقت البنعتذر منا .. تفاصيل بتحيي فينا كل الجزيئات الماتت فينا ..
هيك قالت يمنى حمامي
✴✳🔴✳✴
⭐ ملاحظة:
⊙ قد تكون بعض الصور غير حلبية، وأنا استخدمها إذا كانت الصور الحلبية غير متوفرة..
⊙ تم جمع المعلومات من مصادر عديدة..
⊙ ما رأيك بالمنشور ؟.. علق وشارك 😊
********
المصادر:
– موقع البيان
– موقع سبق- اليوم السابع
– الإمارات اليوم –
– العربية .نت
-صحيفة الثورة السورية
– موقع المصرى اليوم – موقع عكاظ
– مواقع تواصل إجتماعي – فيس بوك – ويكبيديا
– مجلة فن التصوير
– إيليت فوتو آرت: https://elitephotoart.net
**********************
