تحية كاريوكا اتجوزت كتير لكن أطول جوازة كملت فيها كانت من الممثل و المؤلف المسرحي فايز حلاوه ، استمرت 18 سنة تحية كانت بتثق فيه جدا و ساعدته في مشواره الفني و كان ليها فضل كبير عليه
لكن حصل بينهم مشاكل كتير و يقال إنه كان بيخونها وفضلت المشاكل دي تكبر لدرجة انه طردها من الشقة بهدوم البيت.. وناس بتقول بلبس النوم.و خد منها كل مجوهراتها. لدرجة انها نزلت من سلم الخدامين عشان محدش يشوفها.
طبعا رفضت تسكن عند أي حد.. وخدت شقة فوق السطوح.. و في يوم كانت بتعمل خدمة في السيد البدوي.. راحت الست صاحبة البيت.. طمعت في الشقة ورمت العفش بتاع تحية برا.. برا بمعني برا.. و رجاء الجداوي استلمت الحاجة من القسم.
وراحت تحية للشيخ الشعراوي عشان يطلقها من جوزها.. فايز حلاوة ، فايز قال ماشي لكن عندي شروط ..
1 – ياخد شقة الزمالك.. الشقة الكبيرة .
2 – متاخدش مجوهراتها.. وملابسها اللي صورت بها الأفلام.
3- ترجع تصور مسرحيتهم “يحيا الوفد”، عشان يبيعها للتلفزيون.
الشيخ الشعراوي جاب الاتنين في بيته يوم شم النسيم.. و قاله هتقبل بحكمي يا فايز.. فقاله طبعا يا مولانا”..
فقال له “الشعراوي”: “أنا حكمت إنك تدفع نفقة متعة 500 ألف جنيه للحاجة تحية”.. فايز مدفعش ومراضيش يسيب الشقة.. فرفعت تحية قضية عليه.
وبعدين بطلت تحضر الجلسات بتاعت القضية.. الشيخ الشعراوي سألها ليه يا تحية يعني دا حقك.. فقالتله: “يا مولانا، فايز راجل متجوز وعنده بنات ومعندوش شقة، هياخدهم ويروح بيهم فين، هو هيتبهدل، وأنا خلاص كبرت ولا أقدر أنضف الشقة ولا أصرف عليها، والشقة اللي أنا قاعدة فيه كويسة”
كانت الشقة اتبرعت بيها ست خليجية بعد ماعرفت اللي حصل لتحية
الشيخ الشعراوي رد عليها: “أنا ابتديت أغير منك يا تحية، ابتدا يتبنى ليكي قصور في الجنة ملهاش عدد”.
كبرت تحية … كبرت شوية حلوين.. وفي يوم مروحة لقت بنت متسابة قدام باب شقتها بنت سنتين.. جريت بيها ع الشيخ الشعراوي، وقالتله اعمل ايه فيها، قالها “يا عبيطة.. ربنا بعتلك حاجة تاخد بايدك للجنة وتقولي اعمل بيها ايه… ربيها طبعا”.. وفعلا ربت البنت.
وكانت بتضحك على اصدقائها .. تقولهم مش عارفين تخلفوا .. دا انا خلفت بعد السبعين ..
تعبت تحية قوي.. تعب الموت.. راحلها طليقها فايز حلاوة، ودخل عليها اوضة المستشفى، لقاها تقريبا في شبه غيبوبة
فقالها “يا حبيبتي يا توحة، ألف سلامة عليكي.. إنت الرقدة دي مش ليكي يا تحية!!”،
فتحت عنيها وقالتلي “يااااه يا فايز إنت لسه بتحبني يافايز؟”، فارتمى على صدرها وهو بيبكي وقالهاً: “وحياة النبي تسامحيني يا تحية!!”.. قالتله مسمحاك يا فايز.
و ماتت الست الجدعة تحية كاريوكا سنة 1999 عن عمر يناهز 84 سنه ، رحمها الله وغفر ذنوبها وأسكنها فسيح جناته..
