قصة حب قويّة جمعت الفنانة اللبنانية جورجيت صايغ بالفنان الراحل ملحم بركات، وبلّشت خلال مشاركتهن بمسرحية «بياع الخواتم» للأخوين الرحباني، يلي كانت من بطولة النجمة فيروز، وتقدّمت سنة 1964 ضمن مهرجان الأرز.جورجيت استرجعت ذكرياتها مع ملحم وقالت: «حبّينا بعض كتير كتير، يمكن حوالي 3 سنين. كان يغار كتير بس غيرة بتجنّن». واعترفت إنّو ملحم عرض عليها الزواج، بس هي رفضت.وأوضحت جورجيت إنّها كانت عنيدة وخافت تتزوّج ويصير الزواج سبب يمنعها من بعض الالتزامات بحياتها أو أشياء ما كانت تجرؤ تعملها وهي زوجة. وقالت له إنّو الأفضل يضلّوا أصحاب، وفعليًا بقيت علاقتهم قريبة كتير، متل العيلة، سواء معه أو مع زوجته.أكتر لحظات الفرح بحياتها كانت لما تغنّي مع ملحم الديو الشهير يلي جمعهن، وقالت: «كنت ألغـي كل مواعيدي. ما بعرف ليه، كنت حسّ حالي طايرة من الفرحة، سعيدة، وهو كمان. كنّا نغنّي ونرقص ونفرّح الناس».وربطت جورجيت علاقة عائلية قويّة ببرندا عازار، زوجة ملحم بركات وأم أولاده الثلاثة، بعكس موقفها من زواجه الأخير من الفنانة اللبنانية مي حريري، يلي ما كانت راضية عنه.وعن سبب عدم رضاها، قالت جورجيت: «كان عنده ولاد كبار، وهيدي حياته وهو حرّ فيها، يحب اللي بدّه ياه. ما فيني قوله تزوّج أو ما تتزوّج، وأنا أساسًا ما عطيت رأيي».ووجّهت جورجيت رسالة مؤثّرة لمي حريري على خلفية الخلافات العائلية بينها وبين ابنها ملحم جونيور مع أشقّائه، وقالت: «يا مي، حبي هالعيلة، والله هالعيلة بتنحب. إذا ما بتحبيهن كرمالك، حبيهن كرمال الأستاذ يلي راح. قدّ ما بتحبي أستاذ ملحم، حبيهن».خبر رحيل ملحم بركات ما كان سهل أبدًا على جورجيت. كانت بالبيت لما دقّ لها ابن أختها وقالها: «خلص، راح». ساعتها صارت تخبط على الطاولة، وعرفت فورًا إنّو هو، لأنّها كانت عارفة إنّه تعبان. انهارت، صارت تبكي وتصرخ متل المجنونة، ومن وقتها صار عندها ضغط.
