لو ركزت في الصورة، هتلاحظ إن جسم الوزة مقلوب تقريبًا، وبطنها ناحية السما، ورقبتها ملفوفة بطريقة غريبة، لدرجة إن رأسها بس هي اللي باينة في الوضع الطبيعي.

والأغرب إن العلماء رصدوا الحركة دي عند أنواع مختلفة من الطيور، مش الإوز بس!

طيب، ليه طائر ممكن يقلب جسمه بالشكل ده وهو في الجو؟ وهل الحركة دي ممكن تأذيه؟

الحركة دي اسمها Whiffling، ودي واحدة من المناورات الجوية المدهشة اللي بتستخدمها بعض الطيور عشان تقلل سرعتها وارتفاعها بسرعة.

الفكرة إن الطائر بيلف جسمه وبيغيّر وضع جناحاته بالنسبة لاتجاه الهواء، وده بيأثر على طريقة مرور الهواء حوالين جسمه، وبيخليه يفقد جزء كبير من سرعته وارتفاعه في وقت قصير.

تخيّل إن الإوزة بتطير بسرعة، وفجأة محتاجة تنزل بسرعة ناحية الأرض أو سطح الميه، أو تغيّر اتجاهها في لحظة!

بدل ما تفضل طايرة بنفس السرعة، بتنفذ المناورة دي، وبتدخل في نزول سريع ومتحكم فيه نسبيًا.

وفي بعض الحالات، الحركة ممكن تساعد الطائر على الهروب من مطاردة أو تفادي طائر جارح، لكن مش معنى كده إنها بتتعمل دايمًا لنفس السبب.

والأجمل إن الطائر بيقدر ينسّق حركة جسمه ورقبته بطريقة تخليه يحافظ على توجيه رأسه نسبيًا ناحية الاتجاه اللي محتاج يشوفه، حتى لو جسمه نفسه مقلوب

وع فكرة، السلوك ده مش مقتصر على الإوز فقط، اتلاحظت كمان مناورات مشابهة عند أنواع تانية من الطيور، زي بعض أنواع البط والزقزاق وطيور تانية بتستخدم حركات جوية معقدة أثناء الطيران

#زياد محمد#الحياة البرية#مجلة ايليت فوتو ارت.