مع بدايه الاسره الخامسه كان بيجتمع ملك مصر القديمه مع رجال الدوله والكهنه امام الهرم ويتابعوا غروب الشمس اللي بتعلن عن بدايه الربيع ، ومع شروق شمس تاني يوم بتبدأ الاحتفالات الشعبيه ، بيخرج الشعب يتمشي علي النيل ويقعدوا في الجناين ، ويحتفلوا حتي غروب الشمس ، المصريين القدماء كانوا مؤمنين ان بدايه الربيع هو بدايه الحياه ، لانه الفصل الذي تتفتح فيه الزهور وبيبدأ فيه الزرع في الخروج من الارض ، واعتبروه عيد وسموه “شمو”

وشمو معناها في الهيروغليفيه بعث الحياه ، واستمر المصريين في الاحتفال بالعيد حتي الان ، واتحرف الاسم من شمو لشم النسيم ، ودايما بيتم الاحتفال بيه كل يوم اتنين من بعد عيد الفحص ، طريقه احتفال اجدادنا مختلفتش عننا كتير دلوقتي ” البيض الملون والفسيخ والبصل والخس ” كل اكله من دول ليها رمز ، البيض وكان رمز لخروج الحياه بيتم نقش البيض وكتابه امنياتهم عليه وتتعلق علي الشجر

البصل بقي كان يعتبر سلاح ضد الامراض والارواح الشريره ، وطبعا الاحتفال ده اتنقل من مصر لدول تانيه كتير بيحتفلوا بيه كل دوله علي طريقتها الخاصه لكن البيض الملون اللي بدعه المصري القديم يبقي الشئ الوحيد المشترك بينهم في كل مكان.

#مجلة إيليت فوتو آرت