بلاش الطاقية… عندي حساسية!😊
جملة أول ما تتقال… تلاقي الضحكة سبقتك، والذكريات فتحت بابها على مصراعيها، وترجع بيك لزمن كان فيه للفوازير طعم تاني… زمن حكاية عمو فؤاد… حكاية عمو فؤاد… صندوق الضحكة والبهجة
لو كانت ذاكرة كل واحد فينا أوضة كبيرة مليانة صناديق الذكريات… كان أكتر صندوق مزركش ومليان نور وضحك هو صندوق عمو فؤاد.
صوت ضحكته لوحده كان كفاية يخلي القلب يفرح قبل ما العقل يفهم.
أول ما تقول لحد من جيل التمانينات والتسعينات:
“عمو فؤاد بيلف بلاد”… أو “عمو فؤاد إدانا معاد”… أو “عمو فؤاد رايح يصطاد”…
تلاقي وشوشهم نورت وابتسامة الحنين ظهرت… كأنك فتحت لهم باب الطفولة تاني.
ماكانش مجرد ممثل بيضحك الناس وخلاص…ده كان فنان فهم الأطفال قبل الكبار، وعرف يدخل قلوبهم من أوسع باب.
سر الشخصية اللي كسبت القلوب
بذكاء شديد اختار يكون “عمو” مش “جدو”.
لأن العم دايمًا في خيال الأطفال هو صاحب الرحلات… والحلويات… والمفاجآت… والحواديت قبل النوم.
اختيار بسيط… لكنه كان سر القرب والمحبة.
كان بيقدم سكيتشات فيها شقاوة الكارتون، وخفة دم مصرية أصيلة، وطعم ولاد البلد…ومش بس ضحك، لأ… معلومات وفوازير تخلي الأسرة كلها تقعد مع بعض تحل وتبعت الإجابات في جواب على العنوان اللي على الشاشة.
وكان الحلم الكبير لأي طفل وقتها… صورة مع “مهندس الكوميديا”.
من العباسية لقلوب الملايين
الحكاية بدأت من حي العباسية سنة 1925،
طفل اسمه فؤاد… ابن عالم اللغة العربية الكبير زكي المهندس.
كبر وهو شايف الفن رسالة مش مجرد تسلية.
كان يروح المسرح قبل العرض بساعتين، يراجع كل تفصيلة بنفسه، ويقف ورا الستارة يقرأ القرآن قبل ما يبدأ العرض… التزام وحب للفن نادرين.
اشتغل في الإذاعة مع صديق عمره عبد المنعم مدبولي،
وصنّعوا سوا ضحك وحكايات فضلت عايشة لحد النهارده.
صداقتهم كانت أقوى من أي إشاعة أو كلام، وفضلوا رفاق رحلة العمر.
وبجانب المسرح والأفلام، قدم برنامج “كلمتين وبس” اللي كان بيحكي عن مشاكل المجتمع بأسلوب بسيط وقريب من الناس.
ثنائيات صنعت السعادة
في حياته الفنية قابل الفنانة شويكار…
وقصتهم بدأت على المسرح لما خرج عن النص وقال لها:
“تتجوزيني يا بسكوتة؟”
ومن هنا بدأ واحد من أجمل الثنائيات في الفن المصري… ضحك وحب ونجاح لسنين طويلة.
وكان بيحب الغنى من صغره، لكن عمره ما غنى لمجرد الغنى… كان دايمًا يوظف صوته لخدمة العمل والفكرة.
الفنان اللي اختار الأطفال
رغم نجاحه الكبير مع الكبار… اختار أصعب جمهور: الأطفال.
قدم لهم الفوازير والأغاني والاسكتشات اللي فيها متعة وتعليم في نفس الوقت.
أغاني رمضان بتاعته مع شويكار لحد النهارده الأطفال بيغنوها في المدارس،
ويقلدوه وهو يقول:ريحة صواني مفحفحة وكوستليتة مشوحة!”
وكام جملة منه كانت كفيلة تفتح باب الضحك طول اليوم:
“فرافيروووو أنا جااااي!”
“مظلوم يا عالم!”
جمل بسيطة… لكن سحرها ما بيروحش.
موقف إنساني ووفاء نادر
في سنة من السنين تعب صحيًا وماقدرش يكمل فوازير “عمو فؤاد”.
فتم الاستعانة بصديقه عبد المنعم مدبولي يقدم فوازير “جدو عبده”.
الناس افتكرت إن بينهم خلاف… لكن الحقيقة إن صداقتهم كانت أعمق من أي منافسة.
مدبولي توفى سنة 2006…وبعده بشهرين بس لحقه صديق عمره فؤاد المهندس،
كأن الرحلة ماكانتش ينفع تكمل من غير بعض.
عمو فؤاد… حالة ما بتتكررش
مرت السنين… وجت أجيال جديدة وفنانين كتير محبوبين،
لكن السحر اللي جمع الأطفال حوالين عمو فؤاد فضل حالة خاصة جدًا.
لحد النهارده… أول ما ييجي رمضان… ناس كتير تدور على فوازيره القديمة،
مش بس للضحك… لكن عشان ترجع لزمن الدفى والبساطة واللمة الحلوة.
الحكمة من الحكاية:الفن الحقيقي مش مجرد ضحك لحظة…
الفن الحقيقي هو اللي يسيب أثر في القلوب ويعيش مع الناس سنين طويلة.
واللي يزرع البهجة في قلوب الأطفال… بيصنع ذكرى ما بتموتش أبدًا.
العبرة:
اللي يشتغل بحب وصدق، ويعتبر شغله رسالة مش مجرد شهرة… ربنا يخلّي أثره باقٍ حتى بعد ما يمشي.
♥️ #مها_القناوى
#حكايات_مها
#حكايات_خالتي_بهية
======***********======
– المصادر:
– موقع : هيبا www.hipa.ae
– موقع الجريدة
– موقع: جامعة الزهراء
– موقع: سانا السوري
– المجلة الجزائرية الثقافية
– دبي، الإمارات العربية المتحدة (CNN)
– مجلة كل الأسرة
– مجلة: الرافد الإماراتية
– موقع وكالة سانا السورية
– موقع : إرم نيوز www.eremnews.com
– موقع مجلة : الحرف والكلمة
– نادي الكتاب اللبناني
– الإتحاد العربي للثقافة
– صفحة المواهب الفوتوغرافية
– موقع :Role- بي بي سي
موقع : عالم التقنية
https://p.dw.com- موقع ألمانيا
– المصدر: https://dantri.com.vn
– موقع عكاظ
– موقع الشرق الاوسط
– موقع رؤية
– جائزة هيبا www.hipa.ae
– موقع الإمارات اليوم
مواقع تواصل إجتماعي – ويكيبيديا.
– موقع: ويب طب www.webteb.com
– موقع الشرق
– موقع اليوم السابع
– العربية.نت
– موقع الجزيرة.نت
موقع : مصراوي
موقع: إيليت فوتو آرت
https://elitephotoart.net
– مواقع: الصحافة الأجنبية.
