بتعرفو شو يعني الشام؟
الشام هيي الأم يلي بيضيع ابنها وبس تلائيه بتضربو، وبتبكي لانها ضربتو
الشام هيي عروسة الزعتر والممروت عند العصر، الشام هيي خنائات الناس برمضان ومابيفطروا ليتصالحوا، الشام هيي قباقيب السكر يلي اكلناها ونحنا مبسوطين، الشام هيي أدان الأموي يلي بيتناوب عليه عشر مأدنين بدون ماتنزعج من صواتهم،
الشام هي العروس الخجلانة يلي عم تتجهز من سوق تفضلي ياست، بدون ماتنسى تجهز بدلة الرقص، الشام هيي الجني الطالع من تم الأمهات على شكل حكاية ادام الصوبيا، الشام هيي البنت الولهانة يلي بتدير قرص التليفون لتسمع صوت حبيبها وتسكر، الشام هيي اللمة والضمة والشمة من ايد الست والجد وهني عم يوزعوا العيدية، الشام هيي المرجوحة وتماري كعك وفتة الحليب بالخبز وتكسير الجوز بالحجر،
الشام هيي انك لو رحت لآخر الدنيي، مارح فيك تشم الا ريحة القرفة والهيل والبهارات ولسا علقان تحت سنانك طعم ملبس اللوز من عند السيوفي بالبزورية.
الشام هيي غرفة مخصصة للضيوف بكل بيت، مابييصير حدا يقوت عليها الا الضيوف، بس مسموح يستخدموها لنشر الملوخية..
الشام هيي فتافيت الخبز يلي مابيجوز تنرمى عالارض، والأكل يلي مابيجوز ينكب بالزبالة مشان ماتطير البركة، الشام هيي حصة جارك متل حصتك بالأكل برمضان، وهيي الصدقة يلي ماحدا لازم يدرى فيها، الشام هيي شجرة جارك المتفرعة بدارك، وهيي الشبابيك بلزئ بعض كأنو صحابها عم يتوشوشو على شي ومع الوشوشة مافي شي مخبا، الشام هيي احاديث النسوان ورا البواب ويلي مابيعرف اسرارها حدا، الشام هيي الزوئ والفهم والأصول يلي بنتعلمو ونحنا بالقماط…. يييييه شو بدي عد لعد، وشو بدي احكي لاحكي، لك الشام لحالها حكاية مابتخلص لو خلصت الدني.
من صفحة يهود الشام
