فاكر المغني التركي ده لما بنته طلعت تغني معاه اغنيته ارامام، والراجل قعد يحضنها ويعيط، وكلنا قعدنا نقول ونعم الابوة ونعم التربية؟ اهو قرر يحرم عياله كلها بما فيهم بنته دي من الميراث، وده بعد مشاكل كبيرة مع ولاده كلهم بما فيهم بنته.
المغني ده ابراهيم تاتلس، اللي هو اشهر مغني تركي، ثروته كبيرة جدًا عقارات واراضي وملايين الدولارات. المعلم دخل المستشفى يشيل المرارة يوم ٧ ابريل اللي فات، وخرج من كام ساعة عمل لقاء صحفي، وشكر الدكاترة وصحابه والرئيس، وقال صراحة انه مش هيسيب ولا قرش لعياله السبعة، وان دي فلوسه وكسبها بنفسه، وهسيبها كلها للدولة، وابويا مسابليش فلوس، ومن النهاردة مليش عيال، ولغيت حرف الالف من حياتي، يقصد احمد ابنه.
طيب عمل كدة ليه مع عياله؟
احمد ابنه رفع عليه قضية حجر، وكان عايز وصاية على ممتلكاته، واتخانقوا وهدد ابوه، وباع من وراه خمس بيوت، وابوه بلغ عنه لحد ما الزمته المحكمة يلبس سوار في رجليه عشان ميقربش من ابوه.
ديلان بنته اللي طلعت غنت معاه وعيطتنا كلنا، كانوا بيفطروا في بوردوم واتخانقوا، راحت حادفاه بريموت التلفزيون، ومرفوع عليها قضية بردو، وباقي عياله كدة نفس الطريقة.
ابراهيم تاتلس بدوره مش ملاك، هو كان منشفها عليهم، بالاضافة انه ليه تاريخ من التعدي على زوجاته وطليقاته، مش تعدي عادي، يعني جو عصابات تكتيف وضرب، وخيانة مع رقاصات، وليه علاقات وزوجات كتير، ومنهم اللي طلع طبنجة ونشهم في رجلهم قصاد الكاميرات وفي المطار، ده غير علاقته اصلا بالمافيا اللي عليها جدل كبير، ده غير انه داعم للكيان من بابه بقا.
فيعني ميغركوش الظاهر في اي حاجة، والمشاعر الفياضة اللي خرجت في فيديو لف حالات الواتس، وهما ماسكين في شعر بعض، ومش قادر اقول في الموقف ده غير اراماااااام.
