أثر مصري بينافس لوحده كل آثار الإغريق مجتمعة بل وينافس الأهرامات المصرية
عمرك سمعت عن “متاهة الفيوم” المفقودة؟ الأثر اللي وصفه هيرودوت بأنه ينافس الأهرامات بل ويفوق كل آثار الإغريق مجتمعة!
تخيل إنك واقف قدام مبنى جواه 3000 غرفة متصلة بممرات ملتوية، لدرجة إن اللي يدخله من غير خريطة أو مرشد مستحيل يعرف يخرج! دي مش قصة خيالية، ده وصف حقيقي لـ “متاهة الفيوم” واحد من أعظم أسرار التاريخ المدفونة تحت رمال مصر لحد النهاردة.
زارها المؤرخ اليوناني هيرودوت في القرن الخامس قبل الميلاد ووصفها بأنها تفوق الوصف، وأكد إنها بتضم 12 ساحة رئيسية و3000 غرفة، نصها تحت الأرض ونصها فوقها. والموضوع مقتصرش على هيرودوت بس، سترابون كمان أكد إن الممرات كانت متشابكة بشكل يخلي الخروج مستحيل من غير مرشد، وديودور الصقلي أشار إلى إنها كانت شايلة أسرار خطيرة تخص تاريخ مصر والبشرية.
ورغم إن فيه ناس بتخلط بينها وبين هرم هوارة القريب (اللي بناه الملك أمنمحات الثالث وحرص مهندسه على تصميمه بملحمة من الدهاليز والأفخاخ عشان يحميه من اللصوص)، إلا إن عظمة المتاهة نفسها بتاخدنا لبُعد تاني خالص.
التقديرات الأثرية بتشير إلى إن المتاهة كانت واخدة مساحة مستطيلة تقريبًا 385 متر من الشرق للغرب و158 متر من الشمال للجنوب، وده بيخليها من أضخم المباني في العالم القديم.
في العصر الحديث، بدأ عالم الآثار فلندرز بيتري خيوط الاكتشاف سنة 1888 لما لقى صفيحة حجرية عملاقة بتمثل سقف المتاهة، ورجعت الآمال تاني سنة 2008 لما استخدمت بعثة أثرية مشتركة بين مصر وبلجيكا (بعثة متاهة) تقنية رادار الاختراق الأرضي (GPR).
البعثة رصدت فعلاً هياكل وأعمدة ضخمة متشابكة في بطن الأرض على عمق من 8 لـ 12 متر تحت الرمال، وده بيأكد إن اللي اكتشفه بيتري مكنش غير جزء صغير من الصرح المهيب ده. أظهرت النتائج وجود شبكة هائلة من الجدران العمودية السميكة اللي بتشكل غرف شبه مغلقة، وده متطابق جدًا مع الأوصاف التاريخية للمتاهة.
بس الأبحاث اتوقفت في ظروف غامضة بحجة ارتفاع منسوب المياه الجوفية، وقالوا إن الحفائر بتهدد سلامة الموقع ، وعشان كده بيفضل ده واحد من أعظم الأسئلة المعلقة في علم الآثار المصرية لحد يومنا ده.
لو كانت المتاهة العظيمة دي موجودة فعلاً، يا ترى مخبية إيه جواها؟ هل هي مجرد معبد جنائزي، ولا كانت مكتبة ضخمة بتضم معرفة مصر القديمة كلها زي ما بيشير بعض الباحثين؟ وهل الأيام اللي جاية ممكن تكشف عن أسرارها المدفونة؟
كتير من الأسرار التاريخية هنعرضها على صفحتنا صفحة المؤرخ محمود عبدالحي فما تنسوش المتابعة عشان يوصلكم كل جديد.
دمتم بخير
#المؤرخ_محمود_عبدالحي#مجلة ايليت فوتو ارت.


