أنستازيا رومانوف ……………

ولدت الأميرة أنستازيا في سنة 1901 وهي أصغر أطفال القيصر نيقولا رومانوف واللي كانت له صدمه لانها كانت البنت الرابعه له وكان نفسه في ولد يورث العرش الروسي.

في سنة 1917 قامت الثورة البلشفية في روسيا القيصرية واعتقل الثوار عائلة القيصر نيقولا رومانوف الحاكمة كلها ، القيصر و زوجته الامبراطورة ألكسندرا وبناتهم الاربعه وولي عهده الامير أليكسي وحطوهم في كوخ في سيبيريا في انتظار محاكمتهم.
كانت انستازيا عندها وقت الثورة 16 سنه وفي سنة 1918 بعد سنه واحده من الثورة قرر الثوار يعدموا كل الاسرة بالرصاص في منجم وبشكل همجي.

في كتاب اتنشر سنة 1992 باسم “القيصر الأخير”
اتحكي فيه اللي حصل بالظبط في اخر ليله لهم صحوا الاسرة كلها في نص الليل وخلوهم يلبسوا هدومهم ع اساس بينقلوهم مكان تاني أأمن من الكوخ دا وبعد دقايق دخل ظابط اسمه يوروفسكي وضربهم بالنار بطريقه عشوائيه.
وبعد ما قتلوهم لقوا في هدومهم مجوهرات ملكيه كتير جدا كانت الاسرة خبتها في هدومهم وفي المخدات اللي بيناموا عليها وكانت لا تقدر بثمن طبعا اتباعت في المزاد بعد كدا عشان العمله الصعبه زي اي ثورة ما بتبدد التراث بجهل وانتقام زايف.
يوروفسكي قال في مذكراته ان المجوهرات من كترها كانت زي الدرع الواقي للاسره وانه مالقاش انستازيا واختها ماريا وانهم هربوا . لكن في ظابط تاني قال انه لقي جثة انستازيا بس وهما بينقلوا الجثث لقوا ان في اميرات لسا احياء وطبعا بطبيعة الحال خلصوا عليهم.
طبعا انتشرت قصه هروب الاميرة انستازيا من القتل وبكدا تعتبر هي وريثة عرش روسيا القيصريه بلا منازع .
ومن الوقت دا واكتر من 10 فتيات ادعوا انهم هما الاميرة انستازيا وفي بنتين اتدفنوا باسم انستازيا بعد وفاتهم وادعائهم انهم هما الاميرة . والاكتر من كدا ان رجالة الثورة كان اي بنت تدعي انها انستازيا ياخدوها لاميره من العائلة المالكة عشان تقول ان كانت هي انستازيا او لاء . وانتشرت فرق بحث عن الاميره الهاربه.

اشهر واحده ادعت انها انستازيا كانت بنت اسمها آنا أندرسون في سنه 1933 في لندن بنت كانت بتنتحر وبترمي نفسها في النهر لكن الناس انقذوها وهي فقدت الذاكرة وفجأه بدون مقدمات رجعت لها الذاكره وقالت انها الاميرة انستازيا
طبعا الاعلام والصحفيين راحوا المستشفي عشان يقابلوها ويعملوا معاها حوار ومقابلات واللي زاد وغطي ان الدكاترة قالوا انها مجهولة الهوية وفيها اثار 4 رصاصات قديمه في جسمها . وطبعا النبلاء الروس اتجمعوا حواليها عشان يعرفوا الحقيقه وكانت كل مره تأكد انها مش عايزه فلوس كل همها تثبت نسبها وبس . وادعت انها وقت المجزرة كانت ماسكه الكلب بتاعها وحماها من الرصاص وفي جندي روسي اخدها بيته وهربها للمجر .

جدة انستازيا كانت وقت الثورة هربت للولايات المتحدة الأمريكية ورفضت تقابل آنا أندرسون وكانت بتأكد ان حفيدتها ماتت مع كل أفراد العائلة المالكة وهي متأكدة .
لكن في صحفي روسي اخد آنا أندرسون عشان تقابل الجدة في امريكا لكن لسوء الحظ ماتت الجدة قبل ما البنت توصل امريكا وبعد كدا اكتر من 12 قريب لأنستازيا انكروا اي صلة بآنا أندرسون عشان يورثوا الجدة لوحدهم بدون شريك من الدرجة الأولى وهاياخد الورث لوحدة بما إنها حفيدتها .

بعد كدا الصحافة نسيت قصة انستازيا ورجعت البنت دي لبريطانيا ودخلت في معركه مع القضاء لاثبات نسبها . وفي سنه 1970 قررت المحكمة بعد سماع الشهود ومراجعة الاوراق والوثائق التاريخية قالت المحكمه ان مافيش ما يثبت ان انستازيا ماتت مع اهلها وقت اعدام الأسرة المالكة وبردو مافيش ما يثبت ان آنا أندرسون دي هي انستازيا رومانوف ورجعوا لنقطة البداية.

بس القصه ما انتهتش هنا

بعد انهيار روسيا الشيو*عيه في بعض الباحثين قالوا انهم عندهم علم بمكان دفن الأسرة المالكة بس كانوا خايفين يصرحوا بدا خوفا من عقاب الحكومة السوفيتية.
لكن دلوقتي وبعد الانهيار خلاص مافيش خوف وانهم مستعدين يقولوا علي مكان رفات أسرة رومانوف.
ودا اللي حصادل فعلا وطلعوا عظام الاسرة المدفونة وعرضوا العظام علي اطباء شرعيين اللي قالوا ان كل أفراد العائلة المالكة ماتوا ماعدا انستازيا وماريا مافيش لهم اي آثار.

طبعا آنا أندرسون ماتت سنه 1984 وفي سنة 1994 عملوا فحص جيني عشان يطابقوها مع أفراد العائلة المالكة وتوصلوا انها مش الاميرة انستازيا واتضح انها بنت واحد من عمال المناجم في بولندا بس الامر الغريب ان ماحدش كان متأكد هل فعلا العينه دي تخص آنا أندرسون؟!.

في سنة 1995 عملوا اختبار مطابقه وجة وتقاسيم جمجمة آنا أندرسون مع الاميرة انستازيا من خلال صورها والمرة دي النتايج كانت ايجابيه .لكن طبعا البحوث الجينيه هي الفيصل لذلك قالوا ان آنا أندرسون دي مش هي الأميرة الهاربه.
في سنه 2005 وبعد تحاليل الحمض النووي الاكثر دقة لرفات العائلة المالكة اكتشفوا ان انستازيا كانت من ضمن الضحايا هي وكل اخواتها وابوها وامها وان كل واحدة ادعت انها انستازيا الوريثة الشرعية للعرش ما هن الا منتحلات للقب فقط .
وبعد تحليل الحمض النووي والتأكد ان العائلة المالكة الروسيه ماتت كلها الشرطة قفلت ملف انستازيا وإلي الأبد.

في الصورة القيصر نيكولا الثاني وزوجتة الامبراطورة ألكسندرا وبناتهم ماريا ، أولغا ، تاتيانا ، انستازيا وولي العهد أليكسي.

د. #صفحات من التاريخ الحديث# مجلة ايليت فوتو ارت.